Lëvizja Vetëvendosje ka votuar kundër buxhetit për Komisionin Hetimor Parlamentar në lidhje me rastet e dhunës seksuale dhe dhunës në familje.
Përgjatë dy orëve deputetët e Kuvendit të Kosovës kanë diskutuar për ngecjet e punës së këtij Komisioni i cili është themeluar tre muaj më parë.
VV-ja ka kërkuar që për shkak të mos emërimit të plotë të anëtarëve të këtij Komisioni, të përfundojë mandati i Komisionit, ndërsa opozita ka kërkuar t’i vazhdohet mandati.
Deputeti i Lëvizjes Vetëvendosje, Alban Bajrami, fajin për dështim ia faturoi AAK-së. Sipas tij, kjo parti nuk e ka dërguar emrin për kryetare, teksa kërkoi mendim juridik nga administrata nëse duhet të zgjatet afati apo jo.
Zgjatje të afatit të këtij komisioni kërkoi edhe deputeti i Aleancës për Ardhmërinë e Kosovës, Besnik Tahiri.
“Ne e kemi dërguar shkresën në kryesi për deputeten Albana Bytyqi për kryetare dhe unë mendoj që duhet të zgjatet afati edhe për gjashtë muaj”, u shpreh ai.
E ndaj pushtetit më të ashpër u treguan deputetet e Partisë Demokratike të Kosovës, Ganimete Musliu e Ariana Musliu-Shoshi.
Kjo e fundit, akuzoi VV-në se ka ndjellë ndër vite gjuhë të urrejtjes.
“Çdo ditë fyhemi si rrjedhojë i gjuhës së urrejtjes që ka mbjellë ndër vite VV-ja. Kush nxit më shumë gjuhë të urrejtjes, është pikërisht Lëvizja Vetëvendosje”, tha Musliu-Shoshi.
Ndërsa deputetja e PDK-së, e cila i replikoi Rrustemit, u lëshua në gjuhë, duke i reaguar ashpër.
Ajo ia shtroi një pyetje deputetit të VV-së.“Adnan, a je i padijshëm apo vërtetë po paraqitesh i padijshëm?”, ishte pyetja e Musliut.
Në fund të fjalimit, Musliu i tha “Mos u paraqit budallë kur nuk je o vëlla”. Për këtë gjuhë, reagoi nënkryetarja Kuvendit të Kosovës, Saranda Bogujeveci.
Ajo i tha Musliut “ju lutem, kujdes me gjuhën që përdoret në Kuvend. Nuk është gjuhë parlamentare ajo fjalë e nderuar”.
Me 59 vota për, dy abstenime, deputetët vendosën që të përfundojë mandati i këtij Komisioni.
Seanca e Kuvendit është duke vazhduar mirëpo nuk ka kuorum për votimin e pikave parlamentare.
