Me ekzekutivin nuk po mund të merren vesh. Andaj, SBAShK-u iu drejtua të parës së vendit.
Gjatë së shtunës, presidentja i priti në takim, në përpjekje për të zgjidhur ngërçin, e që për pasojë 320 mijë nxënës kanë mbetur në shtëpi.
Pavarësisht se gjatë takimit nga presidentja Osmani morën zotimin që të ndryshohet kriteri për 15 vjet për skema pensionale për punonjësit kontribut-dhënës që kanë punuar gjatë viteve të nëntëdhjeta, SBAShK-u nuk ndryshoi mendje.
“Është moment i ri që shembullin e presidentes ta marrin edhe kryeministri dhe ministrat që sot ose nesër të ulemi që të bëjmë zgjidhje. Unë ia bëra me dije presidentes se në situatën në të cilën ndodhemi, edhe pas këtij takimi, fatkeqësisht që në situatën që jemi greva do të vazhdojë”, ka thënë kryetari i SBASHK-ut, Rrahman Jasharaj.
Jasharaj u është përgjigjur edhe akuzave të kryeministrit Albin Kurti se mësimdhënësit po nxjerrin analfabetë dhe se kërkesat e grevistëve janë të tepërta.
“Të bëhet një vlerësim i tillë të cilin nuk e ka bërë askush. Nëse prodhohen 67 për qind analfabetë duhet të mbyllen shkollat. Kjo shifër nuk është e saktë, nuk e di nga e kanë marrë. Por edhe nëse kemi një cilësi të tillë, SBASHK-u nuk është fajtor, sepse as nuk bën plan-programe, as nuk merr kuadro në shkollë”, ka thënë Jasharaj.
SBASHK-u ka nisur grevën më 25 gusht me kërkesën për ndarjen e pagave shtesë nga 100 euro çdo muaj deri në miratimin e ligjit të pagave. Kryeministri Kurti e ka quajtur të paarsyeshme grevën në arsim, duke kërkuar që mësimdhënësit t’i kthehen punës në procesin e rregullt mësimor. /Tëvë/
