Ishte paraparë që në ora 10:00 të paraqitej në Prokurorinë Speciale për të dëshmuar lidhur me rezervat shtetërore.
Por aty u shfaqen vetëm një numër i madh i gazetarëve dhe jo kryeministri i vendit, Albin Kurti, i cili shpërfilli sërish urdhrin e Gjykatës Themelore në Prishtinë.
Shefi i ekzekutivit kosovar po insiston që dëshminë të japë në zyrën e tij në Kryeministri.
Avokati, Ardian Bajraktari vlerëson se janë për keqardhje sjelljet e kryeministrit Kurti në raport me drejtësinë.
“Kryeministri Kurti duhet të reflektoj sikurse çdo qytetarë tjetër i Republikës së Kosovës për faktin se hyn në domenin e personave të cilët kanë detyrim të paraqiten përkatësisht të jep dëshminë e tij. Kjo qasje natyrisht se është për keqardhje sepse i sfidon seriozisht institucionet e drejtësisë”, tha Bajraktari.
Ndërkaq, avokati Arbër Jashari tregon se çfarë pasoja mund të ketë për kryeministrin nëse ai refuzon të paraqitet ne Prokurorinë Speciale.
“Ligji në këtë aspekt është shumë i qartë nëse pas një urdhri detyrues nga ana e Gjykatës z.Kurti nuk paraqitet siç ka ndodh sot atëherë ai mund të gjobitet deri në 250 euro. Pastaj z.Kurti ka të drejtë ta apeloj gjobën, por prokuroria sërish mund ta thërras atë për dëshmuar”, tha Jashari.
Lidhur me këtë çështje ka reaguar edhe Këshilli Prokurorial i Kosovës, duke theksuar se ligji nuk mund të interpretohet sipas shijeve dhe nevojave ditore të kryeministrit në detyrë.
