Ka 24 vite që Emine Sahiti merret me mirëmbajtjen e njërës nga Qendrat e Mjekësisë Familjare në Prishtinë.
Por për punën që bën, ajo paguhet 360 euro, pagë kjo e cila siç thotë ajo, është e pamjaftueshme.
“Të mbash familjen me këtë pagë nuk mundesh, duhesh të lësh shumë gjëra për të me ble diçka. Nuk mund të ia dalë askush me këtë pagë, maksimumi 7 ditë, tre javë të tjera çfarë të bësh”, shprehet ajo.
Por ani pse është e zhgënjyer me trajtimin që u bëhet punëtorëve, Sahiti pret që të përmirësohen kushtet e punës.
“Jemi të zhgënjyer shumë nuk presim shumë por prapë shpresat pak ekziston që ndoshta ndonjëherë do të bëhet më mirë dhe do të mundojnë për punëtorët privat pasi shteti duhet ligjit ta zbatoj njëjtë sikurse për puntorët e sektorit publik ashtu edhe për punëtorët privat”, thotë Sahiti
Të njëjtën pakënaqësi për pagë e ndan edhe Hakif Sylejmani.
Sylejmani, i cili që 17 vite punon si sigurim fizik në QKUK, thotë se paga e tij bruto është 402 euro.
“Atëherë e kam marrë rrogën më të mirë se sot se e kam marrë 125 euro rrogë, i kam marrë 90 euro kujdestari 40 euro i kam pas shujtat, 40 euro të rrugës. Kërkesa jonë është që punëtorët e sektorit privat të kenë pagë të mjaftueshme të mos mendojnë me punu tjetër vend të punës por të mbajnë qatë punime nder e përkushtim”, thotë Hakif Sylejmani – punëtor.
Që nga muaji tetor i vitit 2024, me vendim të Qeverisë paga minimale në Kosovë është 350 euro.
