Ata thonë se niveli qendror nuk po tregon mjaftueshëm interes për ta, dhe rrjedhimisht po mungojnë investimet kapitale ne këtë pjesë të vendit.
Miodrag Miliceviq, drejtori i organizatës AKTIV, thotë për tëvë1 se nuk është i befasuar me mungesën e investimeve nga ekzekutivi, sepse siç thotë ai edhe në të kaluarën nuk pasur investime serioze në veri të vendit.
Sipas tij, po humbet shumë energji në dialogun Kosovë – Serbi, dhe kështu po harrohen disa gjëra me rëndësi për qytetarët.
“Ne nuk kemi parë deri më tani ndonjë investim serioz nga kjo Qeveri në veri të vendit. Duke konsideruar situatën aktuale politike, unë as që po pres se do te ketë ndonjë lëvizje pozitive në këtë drejtim. Normalisht që është zhgënjyese për të gjithë, jo vetëm për qytetarët e veriut. Po harxhojmë shumë energji në çështjen e dialogut mes Kosovës dhe Serbisë, dhe kështu disa gjëra të rëndësishme për qytetarët po lihen anash. Duhet bërë më shumë për komunitetet”, tha ai.
Në anën tjetër, i zhgënjyer me Kryeministrin Kurti shprehet edhe aktivisti i shoqërisë civile Igor Markoviq.
Ky thekson se askush nuk po e përmend fondin për Mitrovicën e Veriut, që ka derivuar si rezultat i marrëveshjes se Brukselit.
“Kryeministri Kurti, nuk tregon interes kur nuk ka vota për të apo për Lëvizjen e Vetëvendosje. Ai po nuk po tregon interes për të investuar këtu apo për ta integruar komunitetin serb. Duket se çdo njeri ka harruar për fondin e Mitrovicës së Veriut, fond ky që rrjedhë nga procesi i dialogut mes Kosovës dhe Serbisë. Bashkimi Evropian është përgjegjës për ta parë se si po përdoren paratë nga ky fond. Nuk po shoh që diçka pozitive do të ndryshoj edhe në të ardhmen”, deklaroi ai.
Mes tjerash, Markoviq është shprehur i zhgënjyer që Kryeministri Kurti nuk ka zhvilluar dialog të brendshëm me ta edhe pse vet shefi i ekzekutivit kishte premtuar për një gjë të tillë.
Kronika e realizuar nga Shpat Blakçori
