Për derbin e madh të futbollit në vendin, derbin e Anamoravës, ndërmjet Dritës e Gjilanit, para medieve ka dalë edhe trajneri i Gjilanit, Ardian Nuhiu, si dhe kapiteni Armend Thaqi.
Drita – Gjilani, luhet të enjten, duke nisur nga ora 14:00 në Stadiumin ndihmës në Gjilan.
“Kemi shfrytëzuar pushimin dy javor të punojmë me futbollistët për tu përgatitur taktikisht e fizik. Jemi munduar ta studiojmë kundërshtarin në detaje më të vogla. Shoh një skuadër të unifikuar dhe të mobilizuar para kësaj ndeshjeje për të bërë punë së bashku, e cila do të na sjellë suksesin. E dimë se kjo ndeshje është shumë e rëndësishme për tifozët, gjithashtu e veçantë dhe ngelet në histori. Është ndeshje speciale dhe është kënaqësi të jesh pjesë e këtij derbi, por gjithashtu edhe sfidë e përgjegjësi. Kjo ndeshje gjithnjë ka qenë shumë e rëndësishme si në aspektin e pikëve, ashtu edhe në atë të krenarisë”, ka thënë trajneri Nuhiu për gazetarët.
Ndërkohë mbrojtësi i djathtë Armend Thaqi e ka vlerësuar sfidë të vështirë dhe ndeshjen më të madhe në vend.
“Lirisht mund të them se është derbi më i madh në trojet tona. Ne jemi të nderuar si futbollistë që jemi pjesë e këtij derbi e njëkohësisht është përgjegjësi shumë e madhe, por edhe kënaqësi. Vijmë nga një pushim dhe pas dy ndeshjeve në të cilat nuk kemi mund të marrim rezultatet e dëshiruara, humbja me Malishevën dhe barazimi me Prishtinën, duke bërë dy hapa fals. Është ndeshje shumë e vështirë, por duhet të kthehemi te ecuria jonë e mirë, duhet të mendojmë te fitorja”, ka thënë Thaqi.
Gjilani, pas 25 xhirove mban pozitën e katërt në tabelë me 35 pikë, 19 më pak se rivali i përhershëm Drita, si kryesuese e Superligës.
Në total ky pritet të jetë derbi numër 50-të kampional që nga pasluftja ndërmjet këtyre dy skuadrave, ndërkohë i 56-ti në të gjitha garat.
Kjo ndeshje zhvillohet të enjten më 27 mars në stadiumin ndihmës në Gjilan dhe fillon nga ora 14:00.
