Avokati, Anton Nrecaj nga Instituti Clard, ka thënë se ligji për Byronë Shtetërore për Verifikimin dhe Konfiskimin e Pasurisë së Pajustifikueshme ka disa të meta.
Nrecaj ka thënë se si institut kanë pasur vërejtje të shumta për mënyrën se si është hartuar dhe si mendohet të funksionon kjo byro.
“Në momentin kur është bë propozimi i projektligjit të tillë, ne kemi pasur vërejtje të shumta, jo për arsyen, argumentin që nuk është i nevojshëm një ligj i tillë, mirëpo për argumentin-mënyrën se si është hartuar dhe si mendohet të funksionoj kjo byro”, ka thënë ai në emisionin “Ditari” në Tëvë1.
Sa i përket vërtetimit që një zyrtar ka fituar pasuri të pajustifikueshme, Nrecaj thotë që në kuadër të këtij ligji humbet elementi i barazisë në proces.
“Sa i përket rolit të Prokurorisë, që një zyrtar ka fituar ose ka bë pasuri të pajustifikueshme ajo konisederohet si vepër penale. Nga ana tjetër, në kuadër të këtij ligji humbet edhe elementi i barazisë në proces. Për shkak që nëse pasuria justifikohet dhe në fund vërtetohet edhe kundërta, atëherë aspekti i kompensimit të dëmit të shkaktuar nga shteti për shkak që e ka bllokuar pasurinë e një qytetari, kush është institucioni që duhet t’ia kompensojë dëmin e shkaktuar nga pasuria e cila është konfiskuar dhe në fund ka rezultuar të jetë një pasuri e cila ka qenë e krijuar në mënyrë të ligjshme”, ka deklaruar ai.
Tutje, Nrecaj ka numëruar edhe një tjetër të metë të këtij ligji, që sipas tij është periudha e hetimit, pasi që parasheh që t’i hetojë ata qytetarë të cilët kanë fituar pasuri vetëm pas vitit 2008.
“E meta tjetër është që ky ligj i heton të gjithë ata qytetarë të cilët konsiderohet që kanë krijuar pasuri nga viti 2008, d.m.th. nga data e shpalljes së Pavarësisë së Kosovës e tutje. Të gjithë e dimë që procesi i privatizimit vala e madhe, kur korrupsioni është rritë dhe është zhvilluar ka qenë para shpalljes së pavarësisë, gjatë periudhës sa kanë qenë institucionet e përkohshme në bashkëpunim me UNMIK-un”, ka deklaruar avokati.
Ai ka thënë se subjekt i hetimit përveç zyrtarëve mund të jenë edhe familjarët e tyre.
Ndërkohë, lidhur me këtë ligj, Partia Demokratike e Kosovës e ka dërguar në Gjykatën Kushtetuese me pretendimin që ligji nuk është në harmoni me Kushtetutën. Ndërsa, për këtë ka reaguar edhe ministrja e Drejtësisë, Albulena Haxhiu, e cila e ka cilësuar si tentim për zvarritje reformash.
Me këtë ligj parashihet të rregullohet mënyra dhe procedura e verifikimit dhe konfiskimit të pasurisë së fituar në mënyrë të pajustifikueshme, si dhe themelimi, organizimi dhe kompetencat e Byrosë Shtetërore për Verifikimin dhe Konfiskimin e Pasurisë së Pajustifikueshme.
