Një tjetër sukses e ka arritur xhudoja kosovare të premten, por k ëtë herë jashtë tatamit.
Kampionia olimpike, Nora Gjakova, është përzgjedhur në Komisionin e Sportistëve të Federatës Ndërkombëtare të Xhudos (IJF).
Gjakova është bërë anëtare e Komisionit të Sportistëve të IJF-së me propozim të Komitetit Ekzekutiv të Federatës Ndërkombëtare të Xhudos.
Mandati i saj ka nisur të enjten, ndërsa është i vlefshëm katër vjet.
“Pas një karriere të shkëlqyer si Kampione Olimpike, medaliste botërore dhe kampione evropiane, Nora tani do të japë kontributin e saj edhe jashtë tatamit, në një rol vendimtar për të ardhmen e sportit të xhudos”, ka shkruar Federata e Xhudos e Kosovës. “IJF vlerëson lart eksperiencën, perspektivën dhe përkushtimin e saj, cilësi këto që do ta bëjnë Norën një përfaqësuese të jashtëzakonshme për xhudistët kudo në botë”.
Në letrën e dërguar nga Presidenti i IJF-së, Marius Vizer, Nora merr urime për detyrën e re dhe përgjegjësitë me postin vendimmarrës.
”E nderuar znj. Gjakova,
E dashur Nora,
Shpresoj që kjo letër t’ju gjejë mirë.
Kam kënaqësinë t’ju informoj se jeni emëruar si anëtare e Komisionit të Atletëve të IJF-së, duke filluar nga data 19 qershor 2025, pas propozimit nga Komiteti Ekzekutiv i IJF-së.
Komisioni i Atletëve në IJF ka një rol shumë të rëndësishëm në organizatën tonë, duke ndihmuar në formësimin e së ardhmes së xhudos, përmes garantimit që zëri i sportistëve të dëgjohet. Ndërsa vazhdojmë misionin tonë për të zhvilluar dhe promovuar sportin tonë në mbarë botën, në dobi të të gjithë xhudistëve dhe dashamirësve të këtij sporti, jam i bindur se përvoja dhe këndvështrimi juaj si sportiste do të jenë të paçmuara.
Besoj fort se jeni një përfaqësuese e denjë e sportistëve të xhudos. Me kuptimin tuaj të thellë për sportin, përkushtimin tuaj të palëkundur dhe integritetin që ju karakterizon, do të jepni një kontribut të rëndësishëm.
Ju uroj shumë suksese në të gjitha përpjekjet tuaja në të ardhmen, si dhe gjatë mandatit tuaj si anëtare e Komisionit të Atletëve!
Me respekt të veçantë, Marius Vizer”
