Në nëntor të vitit 2022 mori dritën jeshile në Kuvend.
Ligji që parashikonte caktimin e çmimit tavan për disa produkte të përditshme u miratua nga ligjvënësit me 64 vota për.
Megjithatë në vitin 2023, Gjykata Kushtetuese e shpalli këtë Ligj të pavlefshëm, duke argumentuar se nuk ishte në përputhje me Kushtetutën e Kosovës.
E tani, po i njëjti, u rikthye këtë mandat në Qeverinë Kurti III.
Më 20 shkurt, ministrja e Tregtisë, Mimoza Kusari-Lila nënshkroi inicimin e procedurës për të.
“Ky projektligj krijon bazën ligjore për ndërhyrje të shpejtë dhe të drejtë kur përballemi me rritje të papritura të çmimeve, mungesë të produkteve themelore dhe çrregullime në furnizim. Do të adresohen edhe vërejtjet e Gjykatës Kushtetuese nga e kaluara, por që do të ndërtohet një kornizë më e fortë, më e qëndrueshme dhe ligjërisht solide”, u shpreh ajo.
Por, si po e shohin njohësit e ekonomisë këtë rikthim të këtij Ligji?
“Unë shpresoj që version i ri i projektligjit të paktën i adreson gjetjet e Gjykatës Kushtetuese dhe kësisoj pra do të jetë në harmoni me legjislacionin ekzistues dhe do të krijojë një mekanizëm të pavarur i cili parashihet të ndërhyjë ose të propozojë masat për ndërhyrje në treg kur është rasti i çmimeve në rast se kemi ndonjë krizë”, thotw Visa Vokrri – ekonomist.
Mirëpo edhe nëse ky projektligj miratohet, sipas Vokrrit, nuk pritet që të ketë ulje të inflacionit.
“Çmimet tavan apo kufizimet që kanë të bëjnë me çmimet nuk e adresojnë çështjen e inflacionit sepse si masa të tilla janë joefektive në adresim të inflacionit. Pra nuk pritet që rritja e çmimeve të ndalohet përfundimit me vendosjen e çmimeve tavan për produkte të caktuara të shportës të konsumatorit”, shprehet Vokrri.
Ky Ligj, sipas juristëve, duhet të jetë i përhershëm, jo vetëm për raste emergjente.
“Në këtë situatë mendoj që kryeministri e ka mundësinë që Ligjin ta formulojë, ta hartojë konfrom kërkesave të Gjykatës Kushtetuese dhe të jetë Ligj i cili nuk ndërtohet për situatë emergjente. Të jetë Ligj i cili e argumenton një çmim tavan për shkak edhe të inflacionit global i cili e ka godit Kosovën”, thotw Asdren Bytyqi – avokat.
Asokohe në vitin 2022, pasi miratimit në Kuvend, Ligji për çmimet tavan, ishte përballur me kundërshtime të forta nga deputetët e opozitës, të cilët e konsideronin si antikushtetues dhe në kundërshtim me parimet e ekonomisë së tregut të lirë.
Përçka deputetët e Lidhjes Demokratike të Kosovës e kishin dorëzuar atë në Kushtetuese për shqyrtim.
