Pas më shumë se një viti, presidentja Vjosa Osmani doli me një njoftim për pozitën e kryeprokurorit të shtetit.
Ajo deklaroi se e ka refuzuar dekretimin e kandidatit Blerim Isufaj, i cili u propozua nga Këshilli Prokurorial i Kosovës.
Sipas saj deri te ky vendim erdhi si pasojë e evidentimit të disa shkeljeve në procesin e përzgjedhjes.
Me deklaratën e shefes së shtetit nuk po pajtohet, avokati Skënder Musa.
Sipas tij ajo do duhej vetëm të dilte me një vendim, por jo edhe me vlerësime.
“Në asnjë formë dhe variant nuk lejohet të interferojë gjatë emërimit të kryeprokurorit presidentja, e aq më pak në vlerësime siç ka vepruar presidentja në rastin konkret…. Konsiderohet si ndërhyrje në pavarësinë e KPK-së dhe kjo paraqet shkelje të Kushtetutës së Republikës së Kosovës”, tha Musa.
Mirëpo, këto pretendime i kundërshton njohësi i çështjeve kushtetuese, Mazllum Baraliu.
Ai thekson se Kushtetuta i’a jep të drejtën Osmanit që ta kthejë procesin në pikën zero, dhe se nuk ka pasur shkelje në procesin e dekretimit.
“Presidentja i ka respektuar të gjitha procedurat, në këtë rast procedurën ankimore, ka marrë vendimin e duhur që i takon me dispozitat e Kushtetutës dhe që është e autorizuar për atë punë. Palët e pakënaqura lidhur me këtë mund të shfrytëzojnë të gjitha mundësitë ligjore, ankimore por mendoj që tashmë është e qartë që në këtë procedurë ka pasur shkelje të caktuara”, tha Baraliu.
Ndërkaq njohësi i çështjeve ligjore, Anton Nrecaj sqaron të vetmin rast që bart pasoja juridike në këtë proces.
“E vetmja arsyeje që mund të ketë pasoja juridike është prolongimi i procesit të dekretimit të kryeprokurorit të shtetit, gjithmonë me argumentin e pritjes të Gjykatës Kushtetuese. Vendim ky i cili është nxjerrë para ¾ muajve, dhe është dashur që përgjatë kësaj kohe të pritet vendim nga presidentja”, tha Nrecaj.
Televizioni ka tentuar të marrë një qëndrim edhe nga Blerim Isufaj, në lidhje me mos dekretimin e tij nga Presidentja Osmani, mirëpo ai nuk ka qenë i qasshëm.
Osmani të martën ka njoftuar se nuk do të bëjë dekretimin e Kryeprokurit të Shtetit, pasi siç ka thënë ajo, në përzgjedhjen e Blerim Isufaj si kryeprokuror nuk janë respektuar procedurat kushtetuese dhe ligjore.
