Qeveria Kurti pretendon të realizoj projekte të mëdha rrugore që e lidhin Kosovën me shtetet fqinj, megjithëse ekzitojnë disa projekte të tjera të rrugëve magjistrale brenda vendit që nuk po arrijnë të përfundohen tash e sa vjet.
Qytetarët shpeshëherë janë shprehur të indinjuar me gjendjen e tanishme të rrugëve.
Ndërkohë, ditë më parë kryeminisri i vendit Albin Kurti kërkoi nisjen e menjëherëshme të ndërtimit të rrugës Prizren-Tetovë, ku parashihet edhe një tunel 6.4 km.
E për gjithë këtë, eksperti i komunikacionit, Nol Dedaj thotë se më me prioritet nga qeveria duhet të merren rrugët nacionale në vend të cilat janë të papërfunduara tash e 15 vite.
“Duke e pas parasysh se me Maqedoninë na lidh rruga dhe autoudha, dhe që Tetova nuk është largë, atëherë shumë më prioritet dhe më e rëndësishme është që të bëhet ndërtimi i rrugës Em2 dhe Em9 që do të thotë Mitrovicë – Prishtinë dhe Prishtinë – Pejë. Pra të dyja si arterie të Kosovës si rrugë nacionale mbeten tash e 15 vite kështu për shkak të buxhetit meqë secila qeveri që ka ardhë nuk i ka dhënë prioritet, pikërisht do të ndodh edhe me këtë qeveri që prioritet i jep rrugës Tetovë – Kosovë e që ajo rrugë është në projektet ose investimet kapitale të 4-5 qeverive të përparëshme të cilat vetëm që e kanë bërë propozimin për atë rrugë nuk iu është kry edhe fizibiliteti “, thotë Dedaj.
Ndërkohë për tunelin Tetovë – Prizren, Dedaj thotë se me Maqedoninë mund të bëhet lidhja edhe me rrugë të brendshme sikurse me Shqipërinë.
“Rrugët e brendshme apo nacionale i kemi të papërfunduara, mos harroni ne i kemi udhët që na lidhin edhe përmes shqipërisë me autoudhë, me autoudhë lidhemi edhe me Maqedoninë, pra është mirë të i lidhin me rrugë të brendshme e të i zhvillojmë ato nacionale dhe regjionale”, shtoi ai.
Megjithatë investimet e tilla kapitale sipas njohësit të fushës së ekonomisë, Besnik Avdiaj pritet ta dëmtojnë buxhetin e Kosovës.
“Një investim i tillë madhor që po supozohet se do të kaloj vlerën e 200 milionë eurove, do të bëhet në kurriz të projekteve që veçse janë egzistente, rehabilitimi i rrugëve lokale ose zgjerimet e shumë projekteve tjera që kanë mbetë pezull duke u zvarritur dhe patjetër do ta dëmtojë buxhetin dhe projektet që janë në proces e sipër”, bëri të ditur Avdiaj.
Kostoja e përllogaritur e projektit për fillimin e ndërtimit të rrugës Prizren-Tetovë është 200 milionë euro.