Me profesionalizmin e tyre, krerët shtetërorë u mburrën por edhe u ndjenë krenar.
Këta janë njësia elite e Policisë së Kosovës, e njohur si Njësia Speciale Intervenuese, që për mision ka intervenimin në rreziqe ekstreme.
Por, të mërkurën ata protestuan para objektit të Qeverisë së Kosovës për pakënaqësitë rreth shtesave të rrezikshmërisë.
Për këtë reagoi kryeministri, Albin Kurti i cili përpos se nuk ofroi zgjidhje për kërkesat e tyre, mes tjerash tha se këta pjesëtarë kanë pajisje rreth 10 mijë euro secili.
“Secili pjesëtar i NjSI ka pajisje në vlerë prej afër 10 mijë euro. Të ardhurat mesatare të shumicës dërrmuese të pjesëtarëve të kësaj njësie elitare sivjet shkuan mbi 2.200 euro në muaj (paga bazë plus shtesat). Tash do ta kenë edhe shtesën e rrezikshmërisë prej 150 euro në muaj, përderisa vazhdon kjo situatë në veri të vendit, e që është niveli më i lartë i kësaj shtese. Në fund të muajit nëntor i bie që përveç pagës së rritur, secili prej tyre do të marrë edhe shumën neto prej 1.350 euro retroaktivisht (shtesa e rrezikshmërisë shkurt-nëntor 2023)”, ka shkruar Kurti.
Por njohësit e fushës së sigurisë vlerwsojnw se kjo deklaratë e kryeministrit Kurti është e dëmshme dhe nuk është e menduar mirë.
Ish-zv.ministri i Brendshëm, Valdet Hoxha thotë se këto pajisje nuk janë personale të këtyre pjesëtarëve por asete shtetërore, andaj shton se kryeministri duhet ftuar këta efektivë për dialog.
Ndërkaq, eksperti i fushës së sigurisë tregon se një shifër e tillë edhe mund të jetë e saktë për shkak se ato pajisje janë për njësi elitare të cilat i përdorin edhe policitë në rajon.
Tëvë1 ka kërkuar sqarime rreth kësaj shume edhe nga Ministria e Punëve të Brendshme, por që përkundër insistimit gjatë ditës, nuk ka pasur përgjigje.