Nga viti 2003 deri në 2009, Rod Blagojevich shërbeu si guvernator i shtetit të Illinoit.
E pas dy viteve, në vitin 2011 ai mori vëmendje të medieve pasi u arrestua si i akuzuar për korrupsion për 14 vjet.
E në vitin 2020, atë e fali presidenti aktual i SHBA-së, Donald Trump, i cili aktualisht shihet si njeri i afërt me të.
Blagojevich që është me prejardhje prej Serbisë, po flitet që do të jetë ambasadori i ri i Amerikës në Serbi.
Ardhja e tij në këtë post, sipas analistit nga Tirana, Ben Andoni, do ia vështirësojë punën Kosovës në të ardhmen.
Andoni nuk e sheh shumë bashkëpunuese figurën e tij.
“Nëse do të jetë Blagojevich, ai do të jetë me sy të mbyllur për të gjitha politikat e Serbisë ndaj Kosovës. i vetmi fat i joni i madhi në këto momente është momenti i trazirave në serbi dhe unë uroj që ato të vazhdojnë në mënyrë që të zvogëlojnë sa më shumë peshën e zotërit Vuçiq në rajon”, shprehet Andoni.
Për ish ambasadorin e Kosovës në Shqipëri, Sylë Ukshini kjo pozitë nuk lidhet me emra të përveçëm.
Kushdo që vendoset në këtë post, sipas tij, e përfaqëson shtetin.
“Amerika është superfuqi, dhe pavarësisht ku, nuk ka rëndësi se kush caktohet apo emërohet ambasador sepse ai e përfaqëson linjën e një shteti, pra nuk ka qëllim të tij personal sepse vet kam qenë ambasador, ai është transmetues i qëndrimit, pozicionit apo linjës së shtetit”, thotë ai.
Pozitën e ish-ambasadorit të Amerikës në Serbi e ka mbajtur Christopher Hill, mandati i të cilit përfundoi në janar të 2025-ës.
Ai kishte dhënë deklarata të forta për Kosovën, ndër të tjerash duke thënë se s’mendon që Serbisë duhet t’i kërkohet njohja e Kosovës si kusht për hyrje në BE.
