Misioni Paqeruajtës i NATO-s në Kosovë ka njoftuar se një ushtar italian i KFOR-it ka hunbur jetën në një aksident rrugor, që ka ndodhur sot pasdite, në rrugën Pejë – Klinë.
Ai ishte i angazhuar në bazën e KFOR-it në Novosellë dhe është viktimë e një aksidenti rrugor derisa ishte në bordin e një automjeti ushtarak VM90.
“Ushtari, në gjendje kritike dhe pa ndjenja, u transportua menjëherë me helikopter drejt Spitalit Amerikan në Prishtinë”, ka njoftuar KFOR-i, nëpërmes një komunikate shtypi.
Por, ai nuk ka mundur t’iu mbijetojë plagëve dhe u shpall i vdekur rreth orës 16:50.
“Në mjetin e përfshirë në aksident ndodhej edhe një tjetër ushtar i cili u transportua në një gjendje të vetëdijshme dhe të qëndrueshme në Camp Villaggio Italia me ambulancë, dhe më pas u dërgua në spitali ushtarak në Camp Film City për kontrolle të mëtejshme”.
Prokuroria e Kosovës në Pejë ka konfirmuar se në aksidentin që ndodhi në fshatin Leshan është lënduar dhe një civil, drejtuesi i një kamioni të përfshirë në ndeshje. Ai cilësohet si i dyshuar për aksidentin e shkaktuar.
Zëdhënësi i Prokurorisë Themelore të Pejës, Shkodran Nikçi, tha se personi i dyshuar për shkaktimin e aksidentit është dërguar për mjekim të mëtejshëm në QKUK në Prishtinë.
“Ai është ndaluar për 48 orë”, tha Nikçi.
Komandanti i KFOR-it, gjeneralmajor Özkan Ulutas, ka shprehur ngushëllimet e tij për vdekjen e ushtarit.
“Mendimet e mia janë me familjen dhe miqtë e ushtarit që ndërroi jetë në këto rrethana tragjike. I urojmë dhe shpresojmë tjetrit një shërim të shpejtë ushtar i plagosur”.
Policia Ushtarake Ndërkombëtare po heton shkakun e aksidentit, më bashkëpunim me autoritetet vendore dhe ndërkombëtare, përfundon njoftimi i KFOR-it./eo/
