Inspektorati Policor i Kosovës (IPK) ka arrestuar një zyrtar policor të angazhuar në Stacionin e Policisë Kufitare në Glloboçicë.
I njëjti dyshohet se ka ushtruar dhunë fizike ndaj një të mituri jashtë orarit të punës.
“Menjëherë pas pranimit të informatave, janë ndërmarrë veprime paraprake hetimore në bashkëpunim me Prokurorinë Themelore në Ferizaj”, thuhet në njoftim.
IPK konfirmon se ndaj zyrtarit të dyshuar është iniciuar hetim për veprën penale “Lëndim i lehtë trupor”, ndërkohë, me urdhër të prokurorit i është caktuar masa e ndalimit prej 48 orësh.
Përveç ndalimit, IPK ka rekomanduar Policisë së Kosovës që të suspendojë zyrtarin policor në fjalë, në përputhje me kompetencat ligjore dhe për të mundësuar zhvillimin e mëtutjeshëm të hetimeve pa ndërhyrje.
