Me moton simbolike “Një pishë, një klasë”, në shkollën fillore “Mitrush Kuteli” në Prishtinë është zhvilluar një aksion për gjelbërimin e ambientit, duke përfshirë nxënësit, prindërit dhe komunitetin lokal në një nismë të përbashkët për mbrojtjen e mjedisit.
Gjatë këtij aktiviteti janë mbjellë rreth 100 trupa pishe, lule trendafili dhe bimë të tjera dekorative në oborrin e shkollës, duke krijuar një ambient më të pastër dhe më të bukur për nxënësit dhe banorët përreth.
Mirënjohje e veçantë i është dhënë z. Xhafer Hasani, gjyshi i njërit prej nxënësve dhe një anëtar aktiv i komunitetit, për angazhimin e tij të palodhshëm në mirëmbajtjen e hapësirave të gjelbra.
Në këtë aksion mori pjesë edhe drejtori i Drejtorisë Komunale të Arsimit në Prishtinë, z. Samir Shahini, së bashku me zyrtarë të tjerë të arsimit, duke i dhënë mbështetje simbolike dhe morale kësaj nisme të rëndësishme.
Ky aktivitet është një dëshmi e bashkëpunimit të ngushtë mes shkollës “Mitrush Kuteli”, familjeve, komunitetit dhe institucioneve, me një qëllim të përbashkët: një mjedis më të gjelbër dhe një të ardhme më të pastër për të gjithë.
