Gjykata Themelore në Prishtinë i ka caktuar masën e paraburgimit prej një muaji Tomë Dodajt, ku i njëjti dyshohet se është i përfshirë në vrasjen e Liridona Ademajt.
Sipas Gjykatës, Tomë Dodaj, dyshohet se ka kryer veprën penale “Importi, eksporti, furnizimi, transportimit, prodhimi, këmbimi, ndërmjetësimi” ose “Shitja e paautorizuar e armëve apo materieve plasëse”.
“Ngase ekziston dyshimi i bazuar se i pandehuri T.D ka kryer veprën penale, andaj nëse i njëjti gjendet në liri, mund të ndikoj në të dëmtuar dhe në dëshmitarë, si dhe ekziston edhe rreziku i përsëritjes së veprës penale, e të gjitha së bashku kanë plotësuar bazën ligjore për caktimin e masës së paraburgimit”, thuhet në komunikatë.
Tutje, Tomë Dodaj, dyshohet se në ditën e vrasjes së Liridona Ademajt (29 nëntor) rreth orës 14:00 në vendin e tij të punës, me qëllim të përfitimit të dobisë pasurore në kundërshtim me Ligjin në fuqi për armë apo materie plasëse, ia ka shitur armën të dyshuarve Naim Murselit dhe Granit Plavës për të cilën dyshohet se është përdorur në kryerjen e veprës penale “Vrasje e Rëndë”.
“Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë”, thuhet në njoftim.
Ndërkohë, bashkëshorti i të ndjerës, Naim Murseli ngarkohet me veprën penale “Vrasje e rëndë në bashkëkryerje”. Granit Plava ngarkohet me veprat penale “Vrasje e rëndë” dhe “Mbajtje në pronësi, kontroll ose posedim të paautorizuar të armës”. Ndërkaq, Kushtrim Kokalla ngarkohet me veprën penale “Marrëveshje për të kryer veprën penale vrasje e rëndë’’./teve1.info/
