Kryeministri i Kosovës, Albin Kurti dhe Ministri i Financave, Hekuran Murati sot kanë vizituar dy çerdhe në Prishtinë.
“Qëllimi i vizitave ishte shënimi i fillimit të zbatimit të shtesave të ridizajnuara për fëmijë. Shtesat sipas skemës së re u ekzekutuan dje për herë të parë për mbi 417,000 fëmijë në mbarë vendin. Me anë të kësaj skeme mundësohet që secili fëmijë në Kosovë, pa dallim moshe të përfitojë së paku 20 euro në muaj, ndërsa për familjet që kanë tre apo më shumë fëmijë, ata përfitojnë nga 30 euro në muaj për secilin nga fëmijët”, thuhet në komunikatë.
Sipas komunikatës së Qeverisë, vizitat janë realizuar në çerdhen publike “Yllkat” si dhe në çerdhen publiko-private “Zogjtë” në Prishtinë, ku Kurti dhe Murati, janë pritur nga Drejtoresha e kopshtit “Yllkat”, Rifadije Sopi, si dhe Drejtoresha e kopshtit “Zogjtë”, Arta Shushka.
“Në këto dy kopshte qëndrojnë më shumë se 350 fëmijë të grupmoshave 9 muaj deri në 6 vjeç, të cilët njëkohësisht janë edhe përfitues nga skema e re e shtesave për fëmijë”, theksohet në komunikatë.
Ndryshe, një ditë më parë është bërë ekzekutimi i shtesave për fëmijë sipas skemës së re.
“Të gjithë prindërit përfitues sot kanë pranuar në llogaritë e tyre pagesën e shtesave për fëmijë për muajin gusht, sipas skemës së re, ku familjet që kanë deri në dy fëmijë 0-16 vjeç marrin nga 20 euro për secilin, kurse familjet që kanë 3 e më shumë fëmijë 0-16 vjeç marrin nga 30 euro për secilin”, ka shkruar Ministri i Financave, Hekuran Murati, në Facebook./teve1.info/
