Artikullin po e shkruan në Kosovë.
Por, përmbajtja e tij është për luftën në vendin e saj.
Është kjo Viktora Kaidesh, gazetare ne Ukrainë, që për disa muaj po qëndron në Kosovë.
Kaidesh u largua nga territori i Ukrainës, pasi jeta e saj ishte në rrezik nga rusët.
Shkak për këtë, u bë profesioni.
“Secili gazetarë në Ukrainë është kthyer në gazetarë të luftës. Rusët para se ta pushtojnë një qytet, e kanë një listë me emrat e gazetarëve të cilët duhet vrarë në mënyrë që sa më pak të shpërndahet informacionet. Secili nga kolegët tanë është në rrezik për jetën”, thotë gazetarja Kaidesh.
Që nga fillimi i luftës në Ukrainë, janë vrarë dhjetëra gazetarë.
Por, ani pse vet tani është e sigurte, gazetarja nga Luhansk ka frikë për familjen e saj që ndodhet në Ukrainë.
Madje bashkëshorti i Kaidesh i është bashkuar forcave të Ukrainës, për ta çliruar vendin.
“Çdo mëngjes e kontrolloj telefonin tim, në mënyrë që të shoh shenja nëse burri im është ende gjallë. Ai nuk ka kohë të më shkruaj tekste, mjafton ta shoh një plus që ma ka dërguar për ta kuptuar qëështë gjallë”, thotë ajo.
E bashkë me Kaidesh, në Kosovë po qëndron edhe gazetarja tjetër ukrainase, Katerina Bielobrova.
Kjo thotë se gjatë qëndrimit këtu, mësoi edhe për luftën në Kosovë.
“Lufta që po ndodh në Ukrainë, ka shumë dallime me luftën që ndodhi në Kosovë. Kjo pasi që Ukraina e ka mbështetjen e gjysmës së botës. Kosova nuk e kishte këtë mbështetje në kohën e luftës”, shprehet Bielobrova
Ajo thotë se nuk kishte shumë informacione për Kosovën para se të vinte këtu.
Por ajo çfarë pa tek kosovarët e ka habitur dhe shpreson që një ditë Ukraina ta njoh Kosovën.
“Kosova është shumë moderne. Ka një mix kulturash shumë interesante. Shembull, myslimanët dhe ortodoksët jetojnë në një vend dhe nuk ka konflikte mes tyre.Unë besoj që de fakto pavarësia e Kosovës është njohur nga Ukraina, por tani nuk kemi kohë për këtë pjesë, besoj që pas përfundimit të luftës do të zgjidhet kjo çështje”, thotë ajo.
Gazetarët ukrainas po qëndrojnë në Kosovë pas vendimit të ekzekutivit të vendit për ndarjen e mjeteve buxhetore për strehimin e tyre.
Për këtë, ukrainasit duket se janë shumë mirënjohës.
Kronika e realizuar nga Fidan Zejnullahu
