Policia e Kosovës ka njoftuar se ka zbuluar një rast të mashtrimit ku një person në Prishtinë, i rreth 45 – vjeç, u kishte dërguar mesazhe familjarëve të tij, në emër të rrëmbyesve për të përfituar para personalisht.
Sipas PK-së, familjarët kishin raportuar se ai ishte rrëmbyer dhe se nuk kanë pasur informacione për të nga 30 prilli.
“Sot rreth orës 00:45, familjarët kanë denoncuar në polici se, që nga data 30.04.2025, viktima është rrëmbyer nga persona të panjohur dhe nga ajo kohë nuk kanë pasur kontakt të drejtpërdrejtë me të. Sipas denoncimit, rrëmbyesit e pretenduar, përmes mesazheve të dërguara kanë kërkuar një shumë të caktuar të parave, në këmbim të mirëqenies së viktimës, thuhet nga Policia e Kosovës.
Tutje bëhet e ditur se pas veprimeve të policisë të dielën është arritur të lokalizohet vendodhja e tij i cili ishte gjetur i vetëm në një veturë në rrugën “Vëllezërit Fazliu” në Prishtinë.
“Si rezultat i hetimeve intensive dhe veprimeve të koordinuara policore, rreth orës 13:00, është arritur të lokalizohet vendndodhja e viktimës së pretendua, mashkull, rreth 45 vjeç, i cili është gjetur i vetëm në një veturë në rrugën “Vëllezërit Fazliu” në Prishtinë. I njëjti është shoqëruar për intervistim në stacionin policor dhe pas verifikimeve të kryera, është konstatuar se nuk kemi të bëjmë me veprën penale të rrëmbimit.Në fakt, personi në fjalë vetë kishte dërguar mesazhet kërcënuese drejt familjes me qëllim të sigurimit të një shume të caktuar parash për përfitime personale”, thuhet nga Policia.
Policia ka bërë të ditur se në koordinim të plotë me prokurorin e shtetit, është duke vazhduar ndërmarrjen e të gjitha veprimeve hetimore për zbardhjen e plotë të rastit dhe për ndjekjen ligjore të personit në fjalë, për veprimet mashtruese dhe për shqetësimin e shkaktuar familjes dhe institucioneve ligjzbatuese.
