Një fëmijë i moshës 4-vjeç ka vdekur në fshatin Pozheran të Vitisë.
Ai sipas Policisë së Kosovës dyshohet se është goditur me veturë në oborrin e shtëpisë nga drejtuesi i veturës, i cili ka lidhje familjare me fëmijën.
Zëdhënësi i Policisë për rajonin e Ferizajt, Kanun Veseli tha se vdekja e 4- vjetarit është konstatuar nga mjeku.
“Me datën 22.06.2025 rreth orës 18:35, nga stacioni policor në Viti jemi njoftuar se në ambulancën e fshatit Pozheran është dërguar një fëmijë rreth moshës 4-vjeç, i cili është konstatuar pa shenja jete nga mjeku kujdestar. Dyshohet se fëmija është goditur nga një veturë në fshatin Dardani, në oborrin e shtëpisë, ndërsa ngasësi – ka lidhje familjare me viktimën”, ka thënë ai për teve1.info.
Veseli ka thënë se i dyshuari për këtë rast është shoqëruar në stacionin policor në Ferizaj, ndërsa në vendin e ngjarjes kanë dalë njësitet përkatëse policore për të ekzaminuar vendin.
“Për të gjitha veprimet policore është njoftuar prokurori i shtetit, i cili ka urdhëruar inicimin e rastit “Shkaktim i rrezikut të përgjithshëm” dhe ngasësi i veturës është ndaluar në mbajtje për 48 orë”, ka bërë të ditur ai.
