Katër nga pesëmbëdhjetë personat e lënduar nga shpërthimi i bombolës së gazit në një shtëpi në Kçiq të Mitrovicës, janë duke u trajtuar në mjekim intensiv, pasi që gjendja e tyre vazhdon të jetë e rëndë.
Derisa, një fëmijë 10-vjeçar pritet të dërgohet në Suedi, për shkak të natyrës së plagëve të marra nga djegia.
Kështu ka bërë të ditur për Tëvë1, Agreta Gashi, mjeke kujdestare në QKUK.
“15 persona kanë kërkuar ndihmë nga Rajoni i Mitrovicës nga shpërthimi i bombolës së gazit në QKUK, prej tyre 4 janë në gjendje më të rëndë, kanë ardhë për trajtim në mjekim intensiv qendrorë dhe janë duke u trajtuar këtu, prej këtyre katër, rreziku për jetë është në proporcional me shkallën e lartë e me sipërfaqen e djegur të trupit, sipërfaqen më të madhe të djegur e kemi një fëmijë që është në moshën dhjetë vjeçare, i cili pritet të transformohet sot në Suedi, ka sigurim nga shteti suedez”, tha ajo.
Gjithashtu, ajo bëri të ditur se edhe tre persona të tjerë kanë pësuar djegie të natyrës së rëndë.
“Tre të tjerët e kemi një grua që është në sipërfaqe diku 40% dhe dy të tjerë që janë në sipërfaqe më të vogël, mirëpo problemi është që është për shkak të shpërthimit të bombolës rrugët e frymëmarrjes janë të atakume për shkak të gazit që është liruar aty”, theksoi Gashi.
Lajmi është konfirmuar edhe nga Policia e Kosovës, të cilët kanë bërë të ditur se bombola e gazit ka qenë në bodrumin e shtëpisë dhe se të gjithë të lënduarit janë të së njëjtës familje./teve1.info/
