Ka nisur zyrtarisht projekti për restaurimin e Xhamisë së Sudi Efendisë, një nga objektet me vlerë historike e fetare në qendër të Prishtinës.
Kryeministri në detyrë i Kosovës, Albin Kurti, ka theksuar rëndësinë e këtij projekti, duke e cilësuar atë si simbol të rikthimit të kujdesit institucional ndaj trashëgimisë kulturore dhe fetare.
“E ndërtuar fillimisht si mesxhid gjatë shekullit XVI, e më pas si xhami gjatë shekujve XVIII dhe XIX, Xhamia e Sudi Efendisë në qendër të Prishtinës, për një kohë të gjatë është lënë në gjendje të keqe fizike, pa kujdesin institucional, me lokale e ndërtime të larta përreth që ia kanë marrë vëmendjen që meriton dhe hapësirën që i takon.
Por ajo tashmë e ka vëmendjen tonë. Nga sot nisën punimet për restaurimin e saj, që parasheh konsolidimin e strukturës së xhamisë, largimin e lokaleve rrotull dhe në fund rikthimin e saj në shfrytëzim nga komuniteti i besimtarëve mysliman”, shkroi Kurti në një postim në Faceboko.
Ky projekt është përzgjedhur si prioritar për restaurim në kuadër të bashkëpunimit ndërmjet Ministrisë së Kulturës, Rinisë dhe Sportit dhe Bashkësisë Islame të Kosovës.
Kurti bëri të ditur se vlera e investimit nga ana e Ministrisë kap shumën prej 639,776.36 euro./teve1.info/
