Të hënën kanë nisur punimet në modernizimin e njësisë B2, të Termocentralit “Kosova B”, investim ky i Korporatës Energjetike të Kosovës (KEK), në vlerë prej 56.5 milionë euro.
Investimi ka për qëllim rritjen e prodhimit të kapacitetit për njësi, një prodhim vjetor shtesë prej mbi 600 GWh, si dhe një operim më i sigurt dhe më efikas i njësive të TC Kosova B.
Realizimi i projekteve të rehabilitimit bazohet në studimin e fizibilitetit për TC “Kosova B”. Ky rehabilitim do të kontribuojë në përmbushjen e kërkesave mjedisore, duke reduktuar ndotjen e ajrit dhe duke siguruar përputhjen me standardet e Direktivave të Bashkimit Evropian (BE) për emisionet e pluhurit dhe gazrave.
Në nisjen e punimeve i pranishëm ishte edhe kryeministri në detyrë, Albin Kurti
“Unë ju përgëzoj shumë për këtë modernizim të turbinave në Termocentralin Kosova B, edhe të njësisë B1 edhe B2, të cilat janë të sekuencura në kohë, në mënyrë që ta kemi maksimumin e prodhimtarisë, po në të njëjtën kohë ta shtojmë edhe prodhimtarinë edhe sigurinë, edhe efikasitetin, e ta ulim ndotjen”, tha Kurti gjatë vizitës.
Ai në veçanti e uroi menaxhmentin dhe punëtorët e KEK-ut që ky investim prej 56.5 milionë euro po financohet nga vetë KEK-u, prej të cilit do të kemi shtesë prodhimtari të energjisë prej 600 GËh, gjë që përbën lajm të mirë për qytetarët, industrinë dhe ekonominë tonë.
Ministrjanë detyrë e Ekonimisë, Artane Rizvanolli tha se kur të përfundojnë të gjitha punimet për rehabilitimin e Termocentralit “Kosovës B”, jetëgjatësia e tij do të shtohet edhe për 20 vjet, ndotja nga pluhuri dhe oksidet e azotit do të ulën për 60%, kurse remontet kapitale do të nevojiten që të bëhen një herë në 10 vjet, në vend se çdo pesë vjet.
“Kjo do të thotë se siguria e furnizimit do të përmirësohet dukshëm për 20 vjet e ardhshëm, importi do të ulët për së paku 23 milionë euro ndërkaq eksporti do të rritet për së paku 20 milionë në vit”, shtoi ajo.
