Nën brohoritjet e shumta “UÇK”, në sheshin “Skënderbeu” në Prishtinë ka nisur protesta gjithëpopullore në mbrojtje të vlerave të luftës çlirimtare dhe në mbështetje të ish-krerëve të Ushtrisë Çlirimtare të Kosovës, të cilët po mbahen padrejtësisht në paraburgim nga Gjykata Speciale.
Në këtë tubim po marrin pjesë një numër i madh qytetarësh nga e gjithë Kosova dhe më gjerë, ndërsa sheshi po mbushet me njerëz të cilët me zë të lartë kërkojnë drejtësi dhe vlerësim të luftës së UÇK-së.
Motoja e protestës është: “Kundër padrejtësisë! Në mbrojtje të UÇK-së dhe së vërtetës.”
Ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi ndodhen në paraburgim në Hagë që nga nëntori i vitit 2020. Ata ngarkohen me akuza për krime lufte, por të gjithë kanë deklaruar pafajësinë për të gjitha pikat e aktakuzës. Procesi gjyqësor ndaj tyre nisi më 3 prill 2023.
