Ka nisur edicioni i 25-të i maratonës ndërkombëtare, një ngjarje që ka grumbulluar atletë dhe adhurues të vrapimit nga mbarë bota.
Ky aktivitet ka për qëllim jo vetëm promovimin e aktivitetit fizik, por edhe bashkimin e qytetarëve të Prishtinës dhe të Kosovës, duke i ofruar mundësinë të shijojnë një ditë të veçantë të sportit.
E organizuar nga Federata e Atletikës së Kosovës, në bashkëpunim me Komunën e Prishtinës, maratona sivjet mblodhi rreth 1800 garues nga vende të ndryshme të botës.
Me një pjesëmarrje rekord dhe me distancë 44 km, maratona ofron mundësi për të gjithë, nga vrapuesit profesionistë deri te ata amatorë.
Kryetari i Federatës të Atletikës të Kosovës, Halil Sylejmani tha se organizimi për maratonën e radhës fillon që në momentin që mbaron aktualja.
“Ne kemi filluar në vitin 2001 dhe kemi arritur në 2025, do të thotë është e 25-ta me rradhë. Çdo garë që përfundon, ne menjëherë fillojmë me organizimin e garës tjetër dhe kështu që të jemi të gatshëm për një startim sa më të mirë. Sfida ka, do të thotë ka probleme por ne bashkarisht po i kalojmë. Normalisht që është më mirë të angazhohet më shumë çdokush që ka mundësi ta përfundojë. Mediat pak kanë çaluar sivjet edhe pse kemi shumë garues, diku 1800 garues, mirëpo ne i falënderojmë ata që kanë kontribuar dhe që do të kontiribuojnë që kjo garë cdoherë, maratona është me karakter ndërkombëtar dhe të jetë cdoherë ndërkombëtare dhe t’i tregojë botës se ne jemi të gatshëm të organizojmë. Federata Atletike e Kosovës asnjëherë nuk është dorëzuar. Kemi ndihma nga Policia, nga FSK-ja, nga organizata të tjera, gjithashtu kemi edhe nga shëndetësia.”, tha ai
Më tej, Sylejmani shtoi se interesimi për pjesëmarrje në maratonë është shumë i lartë dhe se në maratonë mund të marrë pjesë secili qytetar, pa dallim moshe.
“Është interesant sivjet, ne nuk e kemi planifikuar, sepse po të kishim më tepër numra, ka pasur interesim që të jenë 2000 vetë, mirëpo unë i falënderoj këta që kanë ardhur. Shpërblimet janë 27,000 euro që shkojnë për fituesit dhe kështu shkojmë përpara. Maratona është për të gjithë ata që mund të marrin pjesë, por në kuadër të maratonës nuk ka ndarje për fëmijë, por ditën që zhvillohet maratona, kemi edhe në grup fëmijësh, me aftësi të kufizuara, kemi edhe të rinj edhe veteranë edhe senior, të gjitha kategoritë janë këtu.”, tha ai
Maratona e Prishtinës është një mundësi për të promovuar jetesën aktive dhe shëndetësore, ndërkohë që nxit zhvillimin e turizmit dhe ekonomisë lokale.
