Ka filluar konferenca më e madhe dedikuar liderëve të zhvillimit ekonomik të Ballkanit Perëndimor e më gjerë.
Veprimtaria e sivjetshme e Core Partnership (Partnership for Competitive Region), e cila po mbahet në Kotor të Malit të Zi – bashkon vendimmarrësit, duke përfshirë zyrtarë të nivelit të lartë, përfaqësues komunash, komunitet ndërkombëtar dhe përfaqësues të biznesit nga e gjithë Evropa.
Shteti i Kosovës përfaqësohet nga Instituti Riinvest, ndërkaq pjesëmarrës të këtij eventi janë përfaqësues të qytetit të Prizrenit, Kamenicës, Ferizajit, Pejës, Gjakovës e Lipjanit.
Pjesë e kësaj konference është edhe presidenti i Malit të Zi, Jakov Milatoviq.
Objektivi i Core Partnership është të lidhë vendimarrësit në rajonin e Evropës Juglindore, duke i lejuar ata të shkëmbejnë praktikat më të mira, të prezantojnë punën e tyre dhe të promovojnë projekte të rëndësishme që do të çojnë përpara zhvillimin lokal.
Në këtë ngjarje u bë edhe çertifikimi i disa komunave në rajon, për investim të bizneseve dhe zhvillimin ekonomik lokal.
Nga Kosova nuk ka asnjë komunë të çertifikuar nga Core. Drejtorët e komunave bën të ditur se megjithatë këtë vit pritet të hyjë në fazën e çertifikimit komuna e Prizrenit, Kamenicës dhe Lipjanit.
Kosova është pjesë e këtij rrjeti të CORE nga viti 2022. /Teve1.info/