Në këto ambiente të paraleles për gra të burgut të Lipjanit, Nadica Cvetkoviq, gjatë kohës së luftës shërbeu si gardiane.
Rreth 27 vite pas, ajo po akuzohet se gjatë ushtrimit të këtij profesioni, kreu edhe krime lufte.
Viktima ishin gratë shqiptare, që asokohe ishin të ndaluara.
Me dëshmitë e tyre, Cvetkoviq do të përballet në gjykatë.
“Ai është quajtur burg, po, mund të krahasohet lirisht me kampet e nazizmit, se çfarë kanë bërë me të burgosurit shqiptarë, pa dallim gjinie, si te femrat ashtu si te meshkujt”, tha Jehona Krasniqi – Morina e dëmtuar.
“Vetëm ajrin kemi mund ta thithim brenda dhomës 6 metra katrorë, asgjë tjetër. E kemi pasur të ndaluara vizitat, e kemi pasur të ndaluara ushqimet. E kemi pasur të ndaluar komunikimin me njëra-tjetrën. E kemi pasur të ndaluar daljen për nevoja fiziologjike që ka qenë e kurzuar për 16 orë në ditë”, u shpreh Mevlude Saraqi një tjetër grua e dëmtuar nga Cvetkoviq.
“Kjo ka qenë ma kriminelja. E lëshojke magnetofonin me za të lartë, për mos me u ni britma, edhe ka përdorë dhunë të vazhdueshme ndaj meje. Kam qenë ndër femrat ma të torturume në burgjet serbe. Edhe fizikisht, edhe psiqikisht”, u shpreh Zahrije Podrimçaku.
Me këto akuza, të cilat janë tashmë edhe pjesë e aktakuzës, Cvetkoviq nisi sot përballjen në Gjykatë, si gruaja e parë e akuzuar për krime lufte në Kosovë.
Megjithatë, Cvetkoviq e mohoi fajësinë.
“E mohoj fajësinë për akuzat që më vihen në barrë”, tha ajo.
Aktakuzën ndaj Cvetkoviq, Prokuroria Speciale e ngriti më 16 janar.
Ajo ndodhet nën masën e paraburgimit që nga prilli i vitit të kaluar.
