Këtë deklaratë ai e bëri në një lidhje të drejtpërdrejtë në Tëvë1 ku bëri të ditur se në qytet është një situatë e qetë ndërsa në fshatrat që janë më të prekur nga vërshimet thotë se situata është më e rënduar.
“Ne deri edhe në këto çaste ishim në teren me ekipet tona dhe zyrtarët tonë… Momentalisht situata është e qetë dhe nën kontroll. I kemi disa probleme në disa vendbanime, kryesisht në fshatra si në Lugun e Baranit, Lugun e Lushanit dhe një pjesë në Vitomericë kurse në qytet është gjendja më e qetë, po vazhdojmë të intervenojmë në ato pjesë ku është e mundshme dhe na lejojnë mundësitë teknike kurse janë disa pika të cilat nuk kemi mundur të intervenojmë për shkaqe që janë pjesë më të vështira dhe janë të bllokuara disa kanale që vetëm me rënien e nivelit të ujit mund të intervenohet në to”, tha ai.
Ai tutje tregoi se komuna tashmë e ka një komision i cili do të bëjë vlerësimin e dëmëve të shkaktuara nga vërshimet.
“Para një muaji e kishim një situatë pothuajse të njëjtë në qytetin tonë dhe Komuna e ka formuar një komision për vlerësimin e dëmeve dhe ai komision po besoj që do të jetë prapë aktiv dhe do të jetë i njëjti që do vazhdojë vlerësimin e dëmeve që i ka shkaktuar edhe këto të reshurat e fundit”, shtoi ai./Teve1.info/
