Me goditjen me kokë në kohën e duhur, brenda zonës dhe duke asistuar për golin vendimtar, sulmuesi Nico Williams mund të ketë siguruar vendin e tij në Përfaqësuesen e Spanjës për Kupën e Botës. 20-vjeçari Williams u inkuadrua nga banka e rezervistëve për të asistuar në golin e shënuar nga Alvaro Morata në minutën e 88-të në fitoren ndaj Portugalisë që ia garantoi Spanjës një vend në turneun e fazës finale të Ligës së Kombeve. Dhe kjo mund t’i ketë garantuar atij një vend në Katar, pavarësisht vetëm dy paraqitjeve me fanellën e Spanjës.
Edhe pse nuk e ka startuar dhe nuk ka shënuar gol, paraqitjet e Nicos sollën lëvdata të gjera dhe rritën shanset e tij për t’u zgjedhur nga selektori i Spanjës, Luis Enrique, me tifozët që shfaqën emocionet e tyre për të në mediat sociale.
“Nico ishte krijuesi i diferencës, ai ndryshoi ritmin e lojës”, tha mesfushori spanjoll Rodri pas fitores 1:0 të Spanjës ndaj Portugalisë. “Ai hyri me besim në lojë dhe kjo ishte ajo që na duhej. Ishte një asistim i mrekullueshëm nga ana e tij dhe Alvaro ishte aty për ta përfunduar me gol”.
Morata dhe bashkëlojtarët e tjerë nxituan drejt Williamsit për të festuar golin e fitores. Sulmuesit iu desh të gjente portën e hapur, pasi Williams shkoi pas një mbrojtësi nga shtylla e dytë për të goditur topin drejt Moratas, pas harkimit të mirë të Dani Carvajalit nga krahu i djathtë.
“Morata më tha se goli ishte i imi”, tha Williams. “E pashë atë atje dhe thjesht bëra pasimin drejt tij”.
Spanjës i duhej fitorja për ta siguruar vendin e parë në grup pasi humbi në shtëpi nga Zvicra.
“Vetëm në ndeshjen e tij të dytë Nico ishte kyç”, tha Morata. “Thjesht, më duhej ta shtyja topin në portë”.
Williams kishte sjellë tashmë një shkëndijë në skuadrën e Spanjës në gati 30 minutat që luajti, kur u inkuadrua nga bankina në debutimin e tij kundër Zvicrës. Ai la përshtypje përtej asistimit në 20 minutat që i kaloi në fushë ndaj Portugalisë.
“Për mua është një nder të jem pjesë e Spanjës”, tha Williams. “Shpresoj se mund të arrij në Kupën e Botës, por ky është një vendim për trajnerin”.
Pasi zgjodhi Williamsin për herë të parë, Luis Enrique e vlerësoi atë si një “anësor të vërtetë” me shpejtësi dhe aftësi të shkëlqyera dribluese.
“Ai më tha të jem i guximshëm dhe të jem vetvetja”, tha Williams për këshillat e trajnerit përpara se të hynte në ndeshje ndaj Portugalisë. Williams u aktivizua në minutën e 73-të në vend të Ferran Torresit.
Sulmuesit e tjerë që u ftuan nga Luis Enrique për ndeshjet e këtij muaji po ashtu pretendojnë vend në Kupën e Botës. Bëhet fjalë për Pablo Sarabia, Marco Asensio, Borja Iglesias dhe Yeremy Pino.
Trajneri la jashtë një të ri tjetër, 19-vjeçarin Ansu Fati, sepse ai nuk kishte luajtur shumë me Barcelonën. Fati ka të ngjarë të jetë sfiduesi kryesor për vendin e Williamsit në përfaqësuese. Williams mund të përfundojë duke u bashkuar me vëllain e tij më të madh në Katar, Inakin, i cili gjithashtu luan për Athletic Bilbao dhe duket se në Kupën e Botës do të paraqitet me fanellën e Ganës.
Vëllezërit Williams kanë lindur në Spanjë nga prindër që janë nga Gana dhe janë zhvendosur në Spanjë disa dekada më parë. Për të qëndruar në vend, ata u këshilluan nga një punëtor bamirësie të thoshin se kishin ikur nga një luftë civile në Liberi. Vëllezërit janë ndër të paktët lojtarë me prejardhje nga Afrika që kanë luajtur ndonjëherë për Athletic Bilbaon, klubin tradicional spanjoll që nënshkruan me lojtarë vendas ose me ata që kanë kaluar nëpër akademitë e futbollit të ekipeve në rajonin bask.
