Prokuroria Speciale ka ngritur aktakuzë ndaj dy serbëve për veprën penale pengim i vendosjes së rendit kushtetues.
Siç thuhet në njoftimin e kësaj prokurorie, të lartcekurit kanë tentuar që përmes përdorimit të dhunës të pengojnë vendosjen e rendit kushtetues të Republikës së Kosovës në komunat veriore të vendit.
Po ashtu sipas prokurorisë, për kryerjen e këtyre veprave të njëjtit kanë qenë në koordinim me shumë të pandehur të tjerë të nacionalitetit serb nga Kosova dhe Serbia.
“AKTAKUZË KUNDËR DY PERSONAVE PËR PJESËMARRJA NË TURMË QË KRYEN VEPËR PENALE DHE HULIGANIZMI Prishtinë, 5 shkurt 2024 – Prokuroria Speciale (PS), ka ngritur aktakuzë në Gjykatën Themelore në Prishtinë – Departamentin Special, kundër të pandehurve me inicialet R.P dhe D.O. të nacionalitetit serb. Prokuroria Speciale njofton ekziston dyshimi i bazuar mirë se të lartcekurit në koordinim me shumë të pandehur të tjerë të nacionalitetit serb nga Kosova dhe Serbia, kanë marrë pjesë aktive në grupin përkatësisht turmën e personave me qëllim të kryerjes së veprave penale serioze, përmes përdorimit të dhunës kanë tentuar që të pengojnë vendosjen e rendit kushtetues të Republikës së Kosovës në komunat veriore të vendit. Me këto veprime të pandehurit R.P dhe D.O. akuzohen për veprën penale ‘’Pjesëmarrja në turmë që kryen vepër penale dhe huliganizmi”, nga neni 404 paragrafi 1 lidhur me nenin 31 të Kodit Penal të Republikës së Kosovës”, thonë nga PS.
