Prokuroria Themelore në Prishtinë ka ngritur aktakzuzë dhe ka kërkuar dënimin sipas ligjeve në fuqi të ish-kryeshefit të Telekomit të Kosovës, Agron Mustafa, për dëmtimin e Telekomit të Kosovës përmes kontratave të pafavorshme në vlerë prej mbi 6 milionë e 700 mijë eurove, raporton teve1.info
Sipas komunikatës së Prokurorisë Themelore në Prishtinë, i pandehuri Agron Mustafa, në cilësinë e kryeshefit të Telekomit, duke filluar nga 16 marsi 2015 dhe në vazhdimësi ka lidhur kontrata me kompaninë “Paykos”, të disfavorshme për Telekomin e Kosovës.
“Sipas aktakuzës, i pandehuri, në cilësinë e Kryeshefit Ekzekutiv të Telekomit të Kosovës SH.A në Prishtinë, më 16.03.2015 e në vazhdimësi me dije ka vepruar në dëm të PTK-së, ashtu që përmes lidhjes së anekseve, marrëveshjeve duke ndryshuar kushtet e kontratës në disfavor të ndërmarrjes që ka përfaqësuar, në vend që t’i mbrojë interesat e saj, i njëjti me dashje i ka shkaktuar dëm në shkallë të madhe Telekomit të Kosovës, dhe atë në vlerë prej 6,796,732 € (gjashtë milion e shtatëqind e nëntëdhjetë e gjashtë mijë e shtatëqind e tridhjetë e dy euro)”, thuhet në njoftimin e Prokurorisë.
Sipas komunikatës, Prokuroria i ka propozuar Gjykatës kompetente që i pandehuri të dënohet sipas ligjeve në fuqi për veprën e kryer.
“Me këtë i pandehuri ka kryer veprën penale të lartcekur, andaj Prokurori i Shtetit, me rastin e ngritjes së aktakuzës i ka propozuar Gjykatës që i pandehuri të shpallet fajtor dhe të dënohet sipas ligjit për veprën penale e cila i vihet në barrë”, thuhet në njoftim.