Për më shumë se një vit, këta zyrtarë të Prokurorisë Themelore të Prishtinës zhvilluan hetime për vrasjen e Liridona Ademaj, që kishte tronditur shtetin nëntorin e vitit 2023.
Ndaj të dyshuarve për përfshirje në vrasjen e 39 vjeçares u ngrit aktakuzë të mërkurën.
Ish bashkëshorti, i Liridona Ademaj, Naim Murseli akuzohet se ka përgatitur planin për ta vrarë Liridonën më 29 nëntor te 2023-tës.
Ndërsa, Granit Plava akuzohet si doras, derisa Kushtrimi Kokalla, ish-pjesëtar i Forcës së Sigurisë (FSK), akuzohet se ka dhënë ndihmë në kryerjen e veprës penale. Të tre janë në paraburgim.
Në akuzë është përfshirë edhe një i dyshuar i katërt, që nuk është i përfshirë drejtpërdrejt në rast.
Sipas prokurores së rastit, Jovorka Perlinqeviq kjo lëndë është vonuar kaq shumë për shkak të hetimeve për motivin e vrasjes.
“Dua të sqaroj pse ka kaluar një kohë e gjatë nga ngritja e Aktakuzës. Provat janë mbledhur shpejt për veprën penale. Çka ka munguar ka munguar motivi dhe e kemi të njohur faktin se e ndjera me familje ka jetuar në Suedi. Organeve atje iu jemi drejtuar për të kërkuar të dhëna, nëse kanë pasur të dhëna në lidhje me problemet. Derisa nuk i kemi pasur të dhënat në lidhje me këtë, nuk kam mundur ta ngrisë Aktakuzën. Tani që kemi edhe motivin kemi zbuluar edhe faktin pse ka ndodhur dhe pse janë përfshirë, edhe si janë përfshirë edhe Kushtrim Kokalla dhe Granit Plava. Nuk mundemi me i tregu të gjitha motivet, sepse Aktakuza është dërguar në Gjykatë, por mund të themi se përderisa kanë jetuar në Suedi, Liridona dhe Naimi kanë pasur marrëdhënie të çrregulluara martesore e familjare, gjatë të cilave kanë ardhur edhe deri të problemet pasurore. Arsyet e tjera, të cilat i ka pasur Naimi që ta planifikojë dhe ta bëjë këtë vrasje, mund t’i kuptoni në Gjykatë kur të fillojë seanca”, tha Perlinqeviq.
Sipas saj ka pasur kërkesa nga të pandehurit për pranim të fajësisë por nuk i kanë pranuar.
“Marrëveshje në këtë lëndë për pranim të fajësisë nuk ka pasur, edhe pse mund të themi se ka pasur kërkesë. Për shkak të rastit të rëndë nuk do të ketë marrëveshje për pranim të fajësisë”, tha prokurorja e rastit.
E kryeprokurori i Prokurorisë Themelore në Prishtinë, Zejnullah Gashi theksoi se hetimet janë zhvilluar brenda dhe jashtë vendit.
Dy nga hetuesit në këtë lëndë që morën pjesë edhe në këtë konferencë ishin Nazim Haliti dhe Ibrahim Sahiti.
E të mërkurën, prezent në sallë ishte edhe vëllai i Liridonës, Leonard Ademaj.
Ai pas ngritjes së aktakuzës ka thënë se si familje presin dënim kapital për ta.
Ai tha se edhe fëmijët e Liridonës kanë mësuar për këtë rast dhe tregoi për gjendjen e tyre.
Rasti i vrasjes së 39-vjeçares fillimisht u raportua nga Policia si “grabitje me pasoja të vrasjes”.
Por vetëm një ditë më vonë, Policia arrestoi bashkëshortin e saj, si të dyshuarin kryesor për planifikimin e vrasjes.
Vrasja e Liridona Ademajt nxiti reagime të mëdha në opinion, që u shoqëruan me protesta.
