Kjo seancë e së premtes nuk dalloi nga ajo e dy ditë më parë.
Kjo pasi edhe këtë herë, nuk arriti të zgjidhej kryetari i Kuvendit të Kosovës.
E pas dështimit, kryetari i Partisë Demokratike të Kosovës, Memli Krasniqi akuzoi Vetëvendosjen se po bllokon qëllimshëm këtë proces.
Sipas tij, Kuvendi ose duhet të konstituohet ose të shkohet në zgjedhje të jashtëzakonshme.
“Është e pakuptimtë, e turpshme që për teket e një personi, një kandidati, një deputeteje me mbet peng shteti. Kjo është pengmarrje e shtetit të Kosovës për tekat e një partie e një kandidati. Kanë pasur mundësi që ta ndërrojnë kandidaten sepse nuk imponohen kandidati kur s’e ke shumicën parlamentare…Hapin e parë e ka personalisht Albin Kurti si kryetar i VV-së. Ai duhet ta ndërrojë këtë kandidat. Ose duhet me konstituu kuvendin ose me shku me marrëveshje politike, me shku në zgjedhje të jashtëzakonshme, nuk ka zgjidhje tjetër”, tha kryetari i PDK-së, Memli Krasniqi.
E nga Lidhja Demokratike e Kosovës thanë se nuk mund të bëjnë kompromis për një figurë të papranueshme për ta.
Ndërsa nga Aleanca për Ardhmërinë e Kosovës kërkuan ndërrim të emrit të propozuar.
E nga NISMA thanë se Vetëvendosje duhet të lëshojë rrugë.
Qëndrim nuk ndryshoi as Duda Balje nga radhët e komunitetit boshnjak.
Datë për shkuarje potencialisht në zgjedhje, dha deputetja e Vetëvendosjes, Mimoza Kusari Lila.
“Është e paraparë në Kushtetutë që 30 ditë pas certifikimit të rezultatit zgjedhor është e paraparë që të konstituohet Kuvendi. Ai 30 ditësh është ditë e diel, më 27 prill. Kjo situatë nuk është se mund të shkojë në pafundësi, mund të sjellë në një rrethanë tjetër ku diskutimi i përbashkët me subjekte po afrohet gradualisht një datë tjetër e zgjedhjeve”, tha ajo.
Përfaqësuesit e LVV-së kanë insistuar në kandidaturën e Haxhiut, duke thënë se nuk u takon partive të tjera ta përcaktojnë propozimin.
