Përmes një reagimi të Telekomit thuhet se Bordi dhe Menaxhmenti nuk janë të interesuar për lëvdata nga askush por që janë të detyruar të reagojnë ndaj titujve bombastik dhe shpifës.
“Vlen për t’u përmendur fakti se Bordi dhe Menaxhmenti aktual, që nga marrja e detyrës, madje edhe asnjë nga stafi i Telekomit gjatë vitit 2021, asnjëherë dhe nga askush nuk është dyshuar, akuzuar dhe madje nuk ka pasur as aludime se ka keqpërdorur, abuzuar apo zhvatur AS EDHE NJË EURO TË VETME, siç ka qenë dukuri në të kaluarën”, thuhet në reagim.
Tutje, në reagim thuhet se “humbja NETO e raportuar në pasqyrat financiare të vitit 2021, në vlerë mbi 10 milionë €, është rezultat i paraqitjes në pasqyra financiare të Vendimit të Arbitrazhit në rastin me DARDAFON-in në vlerë mbi 13.4 milionë €, vendim ky i pranuar në vitin 2022, ndaj të cilit do të shfrytëzojmë çdo rrugë të mundshme për ta kundërshtuar si vendim të padrejtë dhe skandaloz. Paraqitja e vendimeve të tilla në pasqyra financiare është obligim sipas Standardeve Ndërkombëtare të Kontabilitetit”.
Telekomi ka prezantuar një tabelë të gjitha kategorive të hyrave dhe shpenzimeve që lidhen me aktivitetin e rregullt afarist të Telekomit për vitet 2019, 2020 dhe 2021.
