Të veshur me uniformën e Ushtrisë Çlirimtare të Kosovës, e flamuj kuq e zi në duar, iu bashkangjiten thirrjes për drejtësi.
Këta studentë të Universitetit “Ukshin Hoti” në Prizren, këtë të premte u mblodhën bashkë për të marrë rrugë për Tiranë.
Në këtë rrugëtim bashkë me veteranë e familjarë dëshmorësh, synim patën të jenë pjesë e protestës gjithëkombëtare në mbrojtje të ish-krerëve të UÇK-së që po mbahen në Hagë.
“Ne sot do të tregojmë se i gjithë populli i Kosovës, i gjithë populli shqiptarë liridashës është krah tyre dhe është me ta dhe ata nuk duhet ta ndjejnë vetën të vetmuar edhe pse janë në burg”, tha ish-luftetari, Halil Çadraku.
“Mendoj që kjo protestë do të jetë shumë shumë e vlefshme, të cilët janë padrejtësisht të burgosur. Ne nuk kemi bërë krime, kemi bërë luftë çlirimtare, kështu që besoj do jetë një ndihmesë e madhe edhe vetëdijësim për popullin tonë që të jemi gjithmonë të bashkuar”, tha ish-luftetari Sami Badalli.
“Mbrojtja e vlerave të luftës, Ushtria Çlirimtare e Kosovës është themeli i shtetit të Kosovës dhe bazuar në këtë nëse dënohen krerët e Ushtrisë Çlirimtare të Kosovës në një fare mënyre dënohet edhe Kosova”, tha qytetari Haxhi Shala.
E ka edhe prej atyre, që këtë protestë e shohin si të vonshme.
“Kjo protestë ka me pas një efekt të jashtëzakonshëm, unë besoj që ka pas por pak më duket që jemi vonu se këto nuk është dashtë me u ndal prej fillimit hiç”, tha Fadil Gashi.
Nga Prizreni për Tiranë, sipas kryetarit të OVL-UÇK-së në këtë komunë, janë nisur 7 autobusë.
“Ne si degë e OVL në Prizren jemi organizuar për të mirë. E veçanta e këtij tubimi është se edhe Unioni i Studentëve ‘Ukshin Hoti’ na ka përkrah dhe do të jenë diku 50 studentë me uniforma të UÇK-së. Ne këtu prej Prizrenit kemi organizu 7 autobusë, por ka që do shkojnë edhe me makina të tyre”, tha kryetari i OVL-UÇK-së në Prizren, Isa Berisha.
Protesta kundër Gjykatës Speciale e në mbështetje të Hashim Thaçit, Kadri Veselit, Rexhep Selimit dhe Jakup Krasniqit, është mbajtur në gusht në Prishtinë, e në shtator te selia e Speciales në Holandë.
Kronikë e realizuar nga gazetarja, Jona Kelmendi.
