Operacioni u zhvillua për disa muaj rresht në Prishtinë e Ferizaj.
E si rezultat i hetimit nga Policia e Kosovës në bashkëpunim me autoritetet e huaja, të mërkurën u arrestua një person.
Ky i fundit dyshohet për hyrje të paautorizuar kompjuterike në një bankë të një shtetit të BE-së.
Veprimi i tillë, sipas Policisë, rezultoi në komprometimin e të dhënave të mbi 300 mijë kartelave bankare, duke shkaktuar dëm të konsiderueshëm.
“I dyshuari dyshohet se i ka postuar për t’i shitur këto të dhëna në një platformë online për përfitime të kundërligjshme. Gjatë realizimit të operacionit të kontrollit janë sekuestruar katër kompjuterë, tre telefona, një USB dhe dokumente të rëndësishme”, thuhet nga Policia e Kosovës.
Por a rrezikohen qytetarët e Kosovës nga hakimi i kartelave bankare?
“Kosova realisht është e rrezikuar nga kjo, nuk ka pasë ndonjë performancë e cila do të ishte lavdëruar sa i përket mënyrës së organizimit të sigurisë qoftë edhe prej sulmeve kibernetike, ku shpesh herë qytetarët e Republikës së Kosovës janë hakuar dhe ndoshta ato llogari të cilat janë konvertuar në kartela të ndryshme janë përdorur në vendet jashtë Kosovës”, tha njohësi i sigurisë, Bedri Elezi.
Tutje Elezi thekson se institucionet po bëjnë pak për vetëdijesimin e qytetarëve në aspektin e mbrojtjes së kartelave bankare.
“Nuk kemi pa për shembull aktivitete të institucioneve të Republikës së Kosovës për t’i paralajmëruar ata se si mund të jenë pre e këtyre grupeve kriminale”, tha ai.
Me vendim të Prokurorit, i arrestuari për rastin e kartelave bankare është ndaluar për 48 orë, për procedura të mëtejme.
Ndërkaq, hetime tjera janë në proces në bashkërendim me autoritetet për të zbardhur plotësisht rastin.
