Propozimi për shtrenjtim të rrymës nga prilli për 15 për qind nuk është befasi për ekonomistin, Safet Gërxhaliu.
Kështu ironizon ekonomisti, pasi që sipas tij mungon transparenca, dialogu e një debat në interes të qytetarëve e që nuk është në “interes të përfitimit të kompanive private”.
“Duke pasur parasysh faktin që në janar të këtij viti është adresuar kërkesa për një rritje prej 35 për qind të çmimit të energjisë elektrike nga tre operatorët kryesorë, një rritje e tillë nuk është befasi. Është befasi nga fakti që mungon transparenca, mungon një dialog i mirëfilltë, mungon një debat që është në interes të qytetarëve dhe të ekonomisë sesa në interes të përfitimit të kompanive të ndryshme”, tha ai në emisionin “Info Nata” në Tëvë1.
Ai tha se nga viti 2021, Kosova po përjeton ngritjen e çmimit të energjisë elektrike tri herë radhazi prej 130 për qind.
“Duhet të pranohet e vërteta që nga viti 2021, Kosova i ka pas tri ngritje të çmimit në formë reale. Në vitin 2021 ka qenë 100 për qind, në vitin 2023 ka qenë 15 për qind dhe në qoftë se do të miratohet kjo kërkesë prej 15 për qind atëherë Kosova do ta ketë një ngritje të çmimit në këtë periudhë kohore prej 130 për qind që vërtetë është një goditje shumë e fuqishme ndaj qytetarëve, por edhe një sfidë e re për sektorin privat në Kosovë, në veçanti për sektorin prodhues”, tha ai.
Ndërkohë, deklaroi se nuk është e vërtetë që Kosova ka çmimin më të lirë të energjisë elektrike.
“Nuk është e drejtë morale dhe etike dikush të thotë që Kosova sot e ka çmimin më të lirë të energjisë elektrike nuk qëndron një fakt i tillë nga fakti që kur flitet për një gjë të tillë duhet të maten shumë parametra ekonomik”, tha ai.
Zyra e Rregullatorit për Energji (ZRRE) të premten ka njoftuar se ka propozuar që çmimi i rrymës të shtrenjtohet për 15 për qind duke nisur nga muaji prill. ZRRE-ja ka publikuar raportin konsultativ për të hyrat maksimale të lejuara, ku është propozuar që çmimi i rrymës të shtrenjtohet sërish./teve1.info/
