Gjykata e Krimeve të Rënda në Prishtinë ua ka caktuar masën e paraburgimit me nga një muaj dy të arrestuarve në fshatin Banjskë të Zveçanit. Ata dyshohen si pjestarë të grupit kriminal që planifikuan dhe shkaktuan sulm terrorist ndaj pjestarëve të Policisë së Kosovës.
Forca të shumta speciale po shkojnë drejt Pallatit të Drejtësisë.
Brenda veturave janë dy të dyshuarit për terrorizëm, Blagoje Spasojeviq dhe Dusan Maksimoviq.
Ata po dërgohen nën përcjellje të pjesëtarëve të njësisë elite të Policisë, para gjyqtarit në Departamentin e Krimeve të Rënda.
Nën dyshimin se të dielën u përfshinë në grupin terrorist që sulmoi me armë zjarri pjesëtarët e Policisë së Kosovës, u vendos që secilit prej tyre t’i caktohet masa e paraburgimit me kohëzgjatje prej një muaji.
Me të përfunduar seanca dëgjimore, nxirren nga objekti për t’u dërguar në vuajtje të paraburgimit.
Por, me pamjen që po e shihte dhe vendimin që u mor, nuk po pajtohet motra e Dushan Maksimoviq.
Derisa, avokati i të arrestuarit po paralajmëron ankesë.
“Ne do të parashtrojmë ankesë dhe kemi paraqitur disa fakte që mendojmë se janë relevante dhe që tregojmë për diçka që ndoshta është më shumë mosmarrëveshje se sa që ka lidhje me veprën penale. Paralajmëroj për nesër ankesë dhe do ta shohim se si gjykata do ta trajtoj këtë ankesë tonën”, tha avokati Dejan Vasic.
Ai ka një kërkesë për institucionet kosovare, derisa thotë se klienti i tij nuk ishte në gjendje të mirë.
“Dje nuk ishte në gjendje të jap deklaratë. Ishte pak i shqetësuar për gjithë që ndodhi, por unë do të kërkoj që ai të merret në pyetje sa më parë, nëse është e mundur që nesër”, u shpreh Vasic.
Vendim i njëjtë u mor edhe për të arrestuarin e tretë.
Një muaj paraburgim u caktua edhe ndaj tij, por që për dallim nga dy të tjetër, Vladimir Toliq po vazhdon trajtimin në Qendrën Klinike Universitare, pasi u plagos në shkëmbim zjarri me Policinë e Kosovës.
Të tre këta u arrestuan pasditen e së dielës në fshatin Banjskë të Zvecanit.
Arton Rama