Presidentja e Kosovës, Vjosa Osmani, në një konferencë për media ka adresuar çështjen e kërcënimeve të mundshme nga Serbia, duke iu referuar edhe paralajmërimeve të fundit të ish-presidentit amerikan Donald Trump për një konflikt të mundshëm në Ballkan.
Osmani siguroi qytetarët se nuk ka arsye për shqetësim, duke theksuar se institucionet e sigurisë janë në krye të detyrës për mbrojtjen e vendit. Ajo tha se kërcënimet nga Serbia janë të vazhdueshme, por se shteti është i përgatitur për t’i përballuar në bashkëpunim me aleatët ndërkombëtarë.
Presidentja theksoi se pas sulmit në Banjskë është rritur prezenca e forcave të sigurisë dhe e trupave të KFOR-it në kufi, me qëllim të parandalimit të përshkallëzimit të situatës.
Ajo reagoi edhe ndaj kritikave se qytetarët nuk janë informuar për rreziqet nga Serbia, duke deklaruar se institucionet kanë dhënë deklarata dhe komunikata të vazhdueshme publike.
Osmani bëri të ditur se në fund të majit janë pranuar informacione të reja nga shërbimet e sigurisë për veprimet e mundshme të Serbisë dhe se menjëherë janë mbajtur takime me institucionet dhe aleatët për të ndalur përshkallëzimin e mundshëm.
Mbështetja ndërkombëtare dhe qëndrimi i SHBA-së
Presidentja foli edhe për takimet në SHBA dhe Letoni, ku sipas saj, është konfirmuar përkrahja e fuqishme amerikane për sovranitetin e Kosovës dhe rrugën e saj euroatlantike. Ajo tha se është diskutuar edhe për bashkëpunim ekonomik dhe përkushtimin e Kosovës për anëtarësim në NATO si kontribuese në sigurinë globale.
Deklaratat e Trump
Në lidhje me deklaratat e Donald Trump, Osmani tha se ato janë interpretuar në kontekstin e përkushtimit të tij për paqe globale dhe se Kosova e vlerëson kontributin e tij në këtë drejtim.
Kriza politike dhe paralajmërimi për Kushtetuese
Në fund të konferencës, Osmani u ndal edhe tek bllokimi i konstituimit të institucioneve pas zgjedhjeve. Ajo paralajmëroi se nëse nuk arrihet marrëveshje deri në fundjavë, do t’i drejtohet Gjykatës Kushtetuese për interpretim. Ajo sqaroi se nuk është kompetencë e Presidentes të ndërmjetësojë për krijimin e koalicioneve politike.
