Sulmuesi i Kombëtares, Rey Manaj ka “hapur zemrën” për golin kundër Serbisë, pak nga fëmijëria e tij si dhe marrëdhënien me familjen. Në një intervistë të shkurtër më Blendi Fevziun për “Opinion Tv”, Manaj ka shpjeguar se në duelin me Serbinë në të cilin humbi penalltinë e ka përjetuar “peshën” e zhgënjimit të skuadrës dhe tifozëve. Ndërsa goli i i bërë kundër tyre në sfidën e fundit, ishte përtej të bukurës.
“Ishte e rëndë humbja e penalltisë, por goli në Serbi ishte një nga momentet e mia më të bukura të karrierës, por besoj edhe jashtë futbollit ishte kënaqësi e madhe për çdo lloj shqiptari. Kam hyrë në moshën 6-vjeçare në fushë dhe kontratën time të parë zyrtare e kam pasur në moshën 16-vjeç”, ka thënë Manaj.
Por larg nga fusha pak nostalgjik dhe shumë i përkushtuar për familjen, sulmuesi ka treguar se me rrogën e tij të parë i kishte kërkuar mamasë së tij që të mos punojë më pasi do të kujdesej ai për prindërit.
“Me rrogën e parë hoqa mamanë nga puna i thashë që do të punojë unë. Prindërit janë pjesa më kryesore e imja, janë gjithmonë me mua”, u shpreh sulmuesi.
Ndër të tjera ai tha se edhe U-21 e Italisë e kishte kërkuar, por nuk ka pranuar. Tanimë sytë sipas tij janë tek fitorja me Poloninë, e cila është e vlefshme për fazën e kualifikueseve të Botërorit 2026.
