Të premten në Prishtinë në ambientet e Bibliotekës Kombëtare të Kosovës, u shënua Dita Botërore e Refugjatëve.
E pikërisht në këtë ditë, Qendra Kosovare për Rehabilitimin e të Mbijetuarve të Torturës (QKRMT), në bashkëpunim me Agjencinë e Kombeve të Bashkuara për Refugjatë (UNHCR), bënë thirrje për mbështetje më të madhe për refugjatët të cilët janë të detyruar të largohen nga vendi i tyre për shkaqe të ndryshme.
Në fjalën e saj hapëse, Drejtoresha ekzekutive e QKRMT-së, Feride Rushiti, tha mes tjerash se kjo ditë duhet të shërbej si reflektim pasi që edhe shqiptarët si pasojë e luftës u detyruan të largoheshin nga vendi i tyre.
“Kjo ditë nuk është vetëm kujtesë për dhimbje që përjetojnë refugjatët dhe personat e zhvendosur me forcë. Kjo ditë është gjithashtu një thirrje për solidaritet dhe veprim. Na kujton për përgjegjësitë tona të përbashkëta për t’i dhënë atyre jo vetëm strehim por edhe mundësi për të rindërtuar një jetë të re në Kosovë” , tha Rushiti.
Kurse, Koordinatorja për Zhvillim e Kombeve të Bashkuara, Arnhild Spence, tha se bota po bëhet gjithnjë e më e pasigurt dhe aktualisht janë rreth 120 milionë refugjatë nëpër vende të ndryshme të botës.
Megjithatë, ajo pati fjalë të mirë për Kosovën për shkak se mijëra refugjatë kanë gjetur strehim të sigurte në shtetin më të ri në Evropë.
“Që nga viti 2000, mbi 29,000 persona të zhvendosur nga komunitetet joshumicë kanë gjetur zgjidhje të qëndrueshme në Kosovë. Kjo është me të vërtetë një arritje e madhe, por çështja e zhvendosjes në Ballkanin Perëndimor dhe për Kosovën nuk ka përfunduar ende”, tha Spence.
E disa refugjatë të ardhur në Kosovë në mënyrë emocionale rrëfyen për rrugëtimin e tyre dhe për vështirësitë më të cilat janë përballur.
“Unë jam Balqees Isaa e ardhur nga Jordania dhe kam dy fëmijë. Kur erdha këtu në fillim kam pasur frikë sepse nuk e njihja vendin dhe nuk e dija se çfarë do të më priste në të ardhmen. E kam vërejtur se kam pasur probleme por me ndihmën e psikologëve ia kam dalë dhe tani ndjehem shumë më mirë”, tha refugjatja nga Jordania, Balqees Isaa.
“Unë quhem Matteo, jam 22 vjeçar dhe kam ardhur nga Lindja e Mesme. Me profesion jam aktor dhe prezantues lajmesh. Dua ta falënderoj KRCT-n dhe UNCHR-n për ndihmë sepse kam kaluar nëpër shumë sfida, kam qenë shumë i vetmuar. Tani jeta ime ka ndryshuar për më mirë”, tha refugjati nga Lindja e Mesme, Matteo.
Dita Botërore e Refugjatëve është themeluar nga Kombet e Bashkuara për të nderuar guximin, forcën dhe vendosmërinë e grave, burrave dhe fëmijëve të cilët janë të detyruar të largohen nga shtëpitë e tyre nën kërcënimin, persekutimin, konfliktit dhe dhunës.
