145 shtretër, të gjithë të zënë.
Nga dy fëmijë në një shtrat, po marrin trajtimin shëndetësor në klinikën e pediatrisë në Qendrën Klinike Universitare të Kosovës.
Ani pse shihet të jetë një fluks i madh i fëmijëve në këtë klinikë, aq shtretër ka klinika brenda hapësirës së saj.
Albana Xani, doktoreshë në këtë klinikë, shprehet se brenda 24 orëve të kujdestarisë janë rreth 150 vizita.
Derisa thekson se ka mungesë të shtretërve.
“Është një fluks shumë i madhë i pacientëve brenda kujdestarisë 24 orëshe diku brenda 150 vizita vetëm në emergjencën pediatrike duke mos i përfshi ambulantat specialistike, ka mungesë të shtretërve vendosen dy fëmijë në një shtrat, sigurisht fëmijët më patologji të njëjtë, të nesërmen dhe atëher kur është mundësia të lirohet ndonjë, sistemohen fëmijët”, tha Xani.
Tutje, në lidhje me këtë Xani thotë se gjatë pranimit të fëmijëve prindërit informohen sa i përket mungesës së shtretërve.
“Në ambulantën e pranimit në emergjencë kur pranohen fëmijët i tregohet prindit që do shtrihen dy fëmijë në një shtrat. Normalisht nganjëherë edhe prindi tjetër që është shtrit me fëmijë aty refuzon”, deklaroi ajo.
Ndërkaq, Xani ka një kërkesë për spitalet regjionale.
“Ndoshta kish me qenë mirë që disa raste që mund të hospitalizohen në spitale regjionale, të trajtohen atje pra apel që spitalet regjionale të trajtojnë fëmijët më shumë që ua lejon dmth gjendja me u trajtu aty fëmijëve”, shtoi Xani.
Sipas Xanit, janë duke u munduar që me këto kushte të ofrohen shërbime për të gjithë fëmijët në nevojë.
Kronika e realizuar nga gazetarja Lendrina Kodrolli.