Nga 22 shkurti i këtij viti qytetarët e Kosovës do të mund të udhëtojnë pa viza edhe në Emiratet e Bashkuara Arabe.
Lajmin e ka bërë të ditur ministrja e Jashtme e Kosovës, Donika Gërvalla.
“Pas nënshkrimit të Memorandumit të Mirëkuptimit mes Republikës së Kosovës dhe Emirateve të Bashkuara Arabe për liberalizimin e vizave për qytetarët e Kosovës, sot kemi pranuar Notën Verbale nga Ministria e Jashtme e EBA-s, përmes së cilës jemi informuar se data e hyrjes në fuqi të Memorandumit të Mirëkuptimit, të nënshkruar me datën 11.01.2024, do të hyn në fuqi me datën 22.02.2024”, ka thënë Gërvalla.
Ajo ka falënderuar presidenten Osmani për kontributin e dhënë në këtë proces, ndërsa ka thënë me hapa të sigurt po fuqizojnë subjektivitetin e shtetit të Kosovës.
“Kështu, me hapa të sigurt po fuqizojmë subjektivitetin tonë ndërkombëtar dhe po arrijmë të zgjerojmë jo vetëm lëvizjen e lirë të qytetarëve tanë”, ka shkruar ajo.
Osmani më 11 janar kishte njoftuar se presidentit i Emirateve të Bashkuara Arabe, Mohamed Bin Zayed kishte pranuar propozimin e për heqjen e vizave për qytetarët e Kosovës.