Ndodhi ajo që u prit me vite të tëra.
Për herë të parë, Këshilli i Ministrave të Bashkimit Evropian votoi të enjten pro liberalizimit të vizave për kosovarët.
Ky vendim e gëzoi pushtetin aktual në Kosovë.
Kryetari i Komisionit Parlamentar për Integrime Europiane, Agon Batusha, thotë se 1 janari i vitit të ardhshëm do të jetë data kur qytetarët do të lëvizin pa viza.
Njësoj si deputeti i Lëvizjes Vetëvendosje, edhe njohësi i politikave të Bashkimit Evropian, Demush Shasha, jep këtë datë përfundimtare për liberalizim.
Por, për këtë vonesë të vendimit të këshillit të ministrave, deputetja e LDK-së, Rrezarta Krasniqi, po e lë fajtore Lëvizjen Vetëvendosje.
Votimin e së enjtes në Këshillin e Ministrave, po e sheh si hap të rëndësishëm edhe eurodeputeti holandez, Thjis Reuten, i cili është edhe raportues për liberalizimin e vizave për Kosovën në Parlamentin Evropian.
Edhe eurodeputeti holandez, 1 janarin e vitit të ardhshëm e sheh si datën e fundit kur qytetarët e Kosovës do të udhëtojnë pa viza.
Kujtojmë se kosovarët janë qytetarët e vetëm të Ballkanit Perëndimor që ende nuk mund të lëvizin të lirë në Zonën Shengen.
Kronika e gazetarit Arton Rama.
