Newcastle Unitedi ka pësuar humbje në shtëpi nga Nottingham Foresti në ndeshjen e parë të xhiros së 19-të në Premier League.
Të martën, Newcastle u mposht me rezultatin 3:1 për ta regjistruar humbjen e tetë këtë edicion.
Më i merituari për këtë triumf të Nottinghamit ishte sulmuesi Chris Wood, i cili shënoi “hat-trick”. Në fakt, Newcastle ishte në epërsi prej fillimit të pjesës së parë, të cilën nuk arriti ta mbajë deri në fund të ndeshjes pasi Nottinghami realizoi tri herë.
Për Nottinghamin, kjo është fitorja e katërt këtë edicion, e cila e ngrit në kuotën e 17 pikëve, ndërsa Newcastle mbetet në 29 pikë të mbledhura.
Sulmuesi Alexander Isak e zhbllokoi rezultatin e ndeshjes në minutën e 23-të.
Suedezi shënoi nga penalltia për ta kaluar Newcastlen në epërsi. Reagimi i Nottinghamit erdhi në fund të pjesës së parë, kur Wood shënoi në kohën shtesë për 1:1 pas asistimit të Anthony Elangans. Wood e kaloi Nottinghamin në epërsi në minutën e 53-të, ndërsa sërish u asistua nga Elanga. Sulmuesi Wood e kompletoi “hat-trickun” me golin e realizuar në minutën e 60-të për rezultatin përfundimtar të takimit.
