Për Mentor Petrelën, ndër 100 neurokirurgët më të mirë në botë, i cili ka kryer rreth 17 mijë operacione, janë dështimet gjatë punës ato që mbesin në mendje, ndërsa sipas tij sukseset harrohen.
Mesazhi i tij është që njerëzit të mësojnë nga gabimet, për të mos e përsëritur dëmin e bërë.
Petrela konsideron se prioritet për sistemin shëndetësor në Shqipëri e Kosovë duhet të jetë shërbimi sa më i mirë ndaj pacientëve.
Ndërkaq, thekson se neurokirurgjia në Kosovë është në prag të një hapi të madh, duke nisur nga investimet që po bëhen, porse krahas infrastrukturës nevojitet edhe shtimi i kapaciteteve njerëzore.
“Nuk kam bërë pak operacione, shkojnë 16 mijë, rreth 17 mijë operacione që bëjnë një qytet. Por, në mendje kam vetëm dështimet, sepse është një profesion që punon me një materie…Sukseset harrohen, suksesi nuk është i përjetshëm, nuk është ai që të mban…Nga gabimi të mësosh, ai është mësimi më i madh…Dështimet i mbaj mend të gjitha”, tregon Petrela.
Petrela për neurokirurgjinë në Kosovë thotë se krahas investimeve në infrastrukturë, duhet të ketë edhe shtim të kapaciteteve njerëzore.
“Natyrisht mundësitë financiare janë gjithmonë të kufizuara në vendet tona, se aq e kemi të ardhura, duke qenë në strukturat që quhen euroatlantike, është e pafalshme që ne të humbim në drejtimin e edukimit të njerëzve “, thotë Petrela për KP.
Kujtojmë se në vitin 2016, “World Academy of Neurological Surgery” përzgjodhi profesorin shqiptar Mentor Petrelën ndër 100 neurokirurgët më të mirë në botë.
