Lumir Abdixhiku të shtunën do të jetë para testit më të vështirë, që prej kur mori drejtimin e Lidhjes Demokratike të Kosovës.
Delegatët e Kuvendit të LDK-së, do të votojnë pro ose kundër qëndrimit të tij në krye të partisë.
Deri tek ky moment, Abdixhiku erdhi pas rezultatit të zgjedhjeve të 28 dhjetorit, që LDK-në e sollën në 13%.
Megjithatë, ish-deputeti i LDK-së, Blerim Grainca, thotë se Abdixhiku ndryshoi qëndrim, nga nata e zgjedhjeve kur iu drejtua gazetarëve.
“Në bazë të statutit të LDK-së ai duhet të vij në Kuvend ta njoftoi Kuvendin që ka dhënë dorëheqje dhe me kaq përfundon. Por si duket ai ka ndërruar qëndrimin do të kërkoi votë-besim, por edhe ftesa që i është dërguar delegatëve, i është dërguar për votë-besim në bazë të nenit 25 të LDK-së i cili kërkon votim të fshehtë për votë-besim, zgjedhja e kryetarit bëhet me votim të fshehtë këtu është i gjithë problemi, lufta po bëhet të mos lejohet votimi i fshehtë të shkohet me votim të hapur”, tha Grainca.
Edhe pas procesit të së shtunës, Grainca thotë se LDK duhet të qëndroj e unifikuar.
“LDK do të gjejë forcë t’i tejkaloi këto dallime, sepse anëtarësia e LDK-së, pret që LDK të jetë unike, kushdo qoftë që provon të manipuloi procesin ai e dëmton LDK-në dhe kjo nuk i kontribuon unifikimit të ruajtjes së LDK-së dhe normalisht prodhon efekte negative”
Deri tash, publikisht kandidaturën për të marrë drejtimin e LDK-së, e ka shprehur ish-kryeministri, Avdullah Hoti.
Mirëpo, profesori Avdi Smajljaj besoj se Abdixhiku ka një përparësi krahasuar me Hotin.
“E vetmja gjë në këtë kuvend do të jetë kërkimi i votës së besimit njëfar mënyre nga z. Abdixhiku një gjë e cila besoj që do të merr prap, duke pasë për bazë që të qenurit si kryetar i LDK-së të jep një llojë përparësie krahasur me kandidatët e tjerë sa i përket mundësisë që degët ose delegatët e tjerë të degëve të votojnë prapë. Kjo është një mundësi apo përparësi në krahasim me z.Hoti i cili e ka paraqitur kandidaturën e tij”, tha Smajljaj.
Përveç Hotit, kundër Abdixhikut i ka dalë edhe deputetja e zgjedhur, Hykmete Bajrami, e cila i kërkoi dorëheqje të menjëhershme.
Kuvendi i LDK-së është paralajmëruar të nis nga ora 12:00.
