Tentimi i parë dështoi.
Të njëjtin fat, e kishte edhe ai i dyti.
Kështu të shtunën, të zgjedhurit e popullit do të mblidhen edhe një herë.
Krejt kjo në tentimin e tretë, për ta bërë atë për të cilën i mblodhën votat më 9 shkurt.
Por, a mund të jetë e dita e shtunë, e treta e vërteta?
“Këtu është vetëm një çështje, të ketë vullnet të pastër politik që të kalohet kjo fazë. Këtë vullnet e kërkoj nga i pari pas procesit zgjedhor, pasi që ai i ka numrat dhe fuqinë për të proceduar tutje. Por duhet ta ketë edhe vullnetin e pastër për ta përmbyllur këtë fazë. Unë nuk po shoh ende vullnet të pastër”, tha analisti politik, Albinot Maloku.
Maloku shton se ky proces do të ishte mirë të përmbyllej pa pasur nevojë për presionin e ndërkombëtarëve.
Por, sa mund të zgjasë kjo situatë e krijuar?
“Në çdo 48 orë mund të vazhdohet, derisa të kryhet. Nuk ka afat. Është absurd në vetvete që këta t’i kundërshtojnë mandatet e tyre, nuk e ka pa as legjislatori. Është e çuditshme, është e pashembullt. Nuk është paraparë as në Kushtetutë dhe as në ligjet në fuqi që të mund të ndodh diçka e tillë, sepse është absurde”, tha profesori universitar, Mazllum Baraliu.
Profesori universitar, Mazllum Baraliu, tregon se kur fillon mandati i deputetit.
“Fillojnë të funksionojnë me mandat të plotë pas të merret raporti edhe një herë nga komisioni teknik i verifikimit të mandateve dhe të miratohet me shumicë votash të deputetëve të pranishëm. Fillon pastaj pika tjetër, zgjedhja e kryetarit, pastaj e nënkryetarëve që do të duhej të shkonte me pako”.
Seanca e së shtunës është caktuar të fillojë në ora 12:00.
