Të premten skadon afati i masës së përkohshme të vendosur nga Gjykata Kushtetuese, përmes të cilës u ndalua çdo vendim dhe veprim i deputetëve të zgjedhur të Kuvendit lidhur me seancën konstituive pas përfundimit të afatit 30 ditor.
Rrjedhimisht edhe pritet të jepet një vendim nga organi më i lartë kushtetues në vend se çka pritet të ndodh tutje.
Një nga opsionet po shihet edhe shkuarja e vendit në zgjedhje të jashtëzakonshme, si mundësi për tejkalimin e ngërçit politik.
Këtë opsion si të udhës po e shohin edhe në partinë fituese të zgjedhjeve nacionale të 9 shkurtit, Lëvizjen Vetëvendosje.
“Nuk kemi informacion për përmbajtjen e Aktgjykimit, por i kemi dorëzuar komentet tona lidhur me çështjen në fjalë. Në këto rrethana, zgjedhjet mbeten zgjidhja më e drejtë dhe demokratike. Masa e përkohshme skadon nesër. Kjo nënkupton që nesër ose do të publikohet Aktgjykimi, ose do të ketë vazhdim të masës së përkohshme”, thuhet nga Lëvizja Vetëvendosje.
Edhe ish-nënkryetari i Gjykatës Kushtetuese, Kadri Kryeziu thekson se në mesin e skenarëve të mundshëm, zgjedhjet janë më reale pasi parlamenti nuk është funksional.
Mirëpo profesori universitar, Avdi Smajlaj këtë vendim po e sheh si vështirë të realizueshëm.
“Por megjithatë është e diskutueshme pak baza ligjore, juridike për këtë vendim sepse fillimisht, proceduralisht kërkohet konstituimi i Kuvendit për t’u shpërbërë që është i domosdoshëm për të shkuar në zgjedhje. Megjithatë, në afat të gjatë nuk pres shumë ndonjë ndryshim të madh në rezultatin e zgjedhjeve gjë që në rast se partitë politike vazhdojnë me pikëpamjet e tyre që i kanë aktualisht për njëra-tjetrën duke mos bashkëpunuar në krijimin e koalicionit, ne mund t’a prolongojmë krijimin e një krize tjetër”, thotë ai.
Sipas tij, mund të ketë edhe variante tjera që mund të merren në vendimin e së premtes.
“Të fillojë procesi nga fillimi, të hapet procesi i votimit të kryeparlamentarit, edhe për këtë është bukur e diskutueshme por megjithatë shtoja kësaj mungesës së bazës kushtetuese sepse Kuvendi dhe vetë Gjykata po përballen me zhvillime të paprecedentë në të kaluarën”, shprehet Smajlaj.
Tëvë1 i ka dërguar pyetje edhe partive tjera për pritshmëritë nga vendimi i Kushtetueses, por që deri në publikim të kronikës nuk ka pasur përgjigje.
